АНҶОМИ БОЗИҲОИ ЗИМИСТОНАИ ОЛИМПӢ

Ванкувер,  1 март. (АМИТ «Ховар», Пайрав  Назаров). —  Дар   шаҳри  Ванкувери  Канада  маросими  ботантанаи  анҷоми  Бозиҳои  21 – уми  зимистонаи  олимпӣ  оғоз  ёфт. Раиси  Кумитаи  байналмилалии  олимпӣ Жак Рогге дар  фарҷоми  маросим байрақи  бозиҳои олимпиро  аз   раиси  шаҳри  Ванкувер Грегор Робертсон  қабул  намуда,  онро   ба  раиси  шаҳри  Сочи  Анатолий  Пахомов  месупорад. Маросими  анҷоми   бозиҳои  олимпӣ дар  варзишгоҳи  марказии  шаҳри  Ванкувер  гузаронида  мешавад.  Ба ҷамъомадагон  барномаи  доманадори  консертӣ  намоиш  дода  мешавад,  дар  фарҷоми  он   иштирокчиёни  бозиҳои олимпӣ  аз   варзишгоҳ  гузар  мекунанд. Хабар  дода  мешавад, ки  дар  ҷараёни  бозиҳои  олимпӣ ба  варзишгарони  беҳтарини 26  мамлакат 86  даста мукофот  дода  шуд.  Дар  бозиҳои  имсолаи   зимистонаи   олимпӣ  зиёда  аз 2,5  ҳазор  нафар  иштирок  дошт. Дастаи  мунтахаби  Канада  дар  бозиҳои  зимистонаи  олимпӣ  ҷои  аввал,  дастаи  мунтахаби  Олмон  ҷои  дуюм  ва  дастаи  мунтахаби  ИМА  ҷои  сеюмро  ишғол  намуданд. Аз  Тоҷикистон  дар  бозиҳои  зимистонаи  олимпии  Ванкувер  танҳо  1  нафар  варзишгар – Андрей  Дригин  иштирок  дошт. Ӯ 27  феврал  дар   даври  охирини  қувваозмоӣ  аз  рӯи  намуди  варзиши  лижаронӣ  аз  мусобиқа   хориҷ  карда  шуд.