КӮМАКИ ҶОПОН БА ШИФОХОНАҲОИ ТОҶИКИСТОН

Душанбе,  10 март. (АМИТ «Ховар», Наталя  Михайлова). —  Имрӯз  дар  Вазорати тандурустии  ҷумҳурӣ  бо  намояндагони  Сафоратхонаи   Ҷопон  дар  Тоҷикистон   маросими  имзои  панҷ   қарордоди  кӯмаки  бебозгашти  Ҳукумати  Ҷопон   ба   шифохонаҳои  Тоҷикистон  баргузор  мегардад.  Маблағи  умумии   қарордодҳо  454  ҳазору  206   доллари  ИМА  аст. Қарордодҳои  мазкурро  иҷрокунандаи  вазифаи   сафири  Ҷопон  дар  Ҷумҳурии  Тоҷикистон  Йошихиро  Накаяма,  муовини  вазири   тандурустии  Тоҷикистон  Соҳибназар  Раҳмонов, раиси  ноҳияи Рӯдакӣ  Мансур  Қодиров, раиси  ноҳияи  Шуғнон Шодихон  Ҷамшедов,  муовини  раиси   ноҳияи  Айнӣ   Гулчеҳра  Саъдуллоева,  директори   маркази   ҷумҳуриявии   илмии  «Стомоталогия»  Умар  Тоҳиров  ва  директори  шифохонаи кӯмаки таъҷилии  тиббии   шаҳри  Кӯлоб  Инъомҷон  Ҳақназаров  имзо  мекунанд. Тибқи  қарордодҳои  мазкур   барои  барқарор  сохтани  фаъолияти  шӯъбаи  бемориҳои  сирояткунандаи  шифохонаи  ноҳияи  Рӯдакӣ 95  ҳазору 776  доллари  ИМА,   барои  беҳтар  сохтани  фаъолияти   шифохонаи  марказии   ноҳияи  Шуғнон  91  ҳазору  273  доллари  ИМА,   барои  барқарор  намудани   шифохонаи  № 1  ҷамоати  Анзоби  ноҳияи  Айнӣ  89  ҳазору  503  доллари  ИМА,   барои  беҳтар  сохтани   сифати  табобати  бемориҳо  дар   маркази  ҷумҳуриявии   илмии «Стомотология» — и  шаҳри  Душанбе  86  ҳазору  703  доллари  ИМА  ва  барои  таҷҳизонидани  шифохонаи   кӯмаки  таъҷилии  тиббии  шаҳри  Кӯлоб  90  ҳазору  951   доллари  ИМА  ҷудо  карда  хоҳад  шуд. Бо  ин  маблағҳо барои  шифохонаҳои   мазкур  асбобу  анҷоми  заруртарини тиббӣ,  аз  ҷумла,  асбобҳои   ташхискунандаи  беморӣ, таскиндиҳандаи  дард  зимни  табобати беморӣ,  дастгоҳҳои  наркоздиҳӣ  ва  ғайра харида  хоҳад  шуд. Мухбири  АМИТ «Ховар»  ёдовар  мешавад, ки  Ҳукумати  Ҷопон   аз  соли  1996 то  имрӯз  барои   амалӣ  сохтани барномаҳои  гуманитарӣ  дар  Тоҷикистон  16,9  миллион  доллари  ИМА  сарф  намудааст.