КАМБУДИҲО ОШКОР КАРДА ШУДАНД

Душабе, 2 март. (АМИТ «Ховар», Лаззат Диловарзод).- Санҷишҳои Кумитаи ҳифзи муҳити зист дар як қатор иншоот ншон дод, ки иқтидори обтозакунии канализатсионӣ дар шаҳрҳои Душанбе, Хоруғ ва Кӯлоб бо назардошти сохтмони босуръати биноҳои истиқоматӣ ва меҳмонхонаҳо нокифоя мебошад. Фаъолияти кумита дар соҳаи ҳифзи ҳавои атмосфера асосан ба таҳлил ва баҳодиҳии корхонаҳои саноатӣ нигаронида шудааст. Мутахассисони соҳа 20 адад корхонаҳои хурди соҳаи коркарди металҳои сиёҳу рангаро  мавриди санҷиш қарор доданд. Санҷишҳо нишон доданд, ки ҶДММ «Бахтиёр ва компания», ҶДММ «Гранд Элит», ҶДММ «Хонг — Да», ҶДММ «Ҷин — Чен» ва  ҶДММ «Ҳамкорӣ — 2001» ҳуҷҷатҳои меъёрии соҳаи ҳифзи муҳити зистро надоранд ва баъзан   партовҳояшон аз меъёрҳои муқарраргардида зиёд мебошад. Нисбати қонуншиканони экологӣ ба маблағи 105 ҳазор сомонӣ ҷарима баста шуда, маблағи ҷарима пурра ситонида шуда, фаъолияти ин корхонаҳо зери назорат гирифта шудааст.