КИШТИ ЧИГИТ ДАР ВИЛОЯТИ СУҒД

Хуҷанд,  26  март. (АМИТ «Ховар», Санавбар  Мақсудова). —  Деҳқонони   кооперативи  истеҳсолии  ба  номи  Юлдошбош Мақсудови   ассосиатсияи  хоҷагиҳои  деҳқонии  «Тоҷикистон» дар  вилояти  Суғд  аввалин  шуда,  24  март   ба  кишти  чигит  шурӯъ намуданд.  Дар  маросими  оғози  кишти  чигит  дар  хоҷагии  мазкур  раиси  вилоят  Қоҳир  Расулзода  иштирок  дошт. Сардори раёсати умумии кишоварзии вилоят Бобоҷон Домуллоев  ба  мухбири  АМИТ «Ховар»  гуфт, ки  имсол  дар  вилоят  барои  кишти  чигит  58  ҳазор  гектар  замин  ҷудо  карда шуд.  Деҳқонони  вилоят  имсол  чигити  навъҳои  «С- 65», «Ирам- 1», «Исфисор – 2», «Рухшон»  ва  ғайраро  кишт  мекунанд. Бояд  гуфт, ки  шудгори тирамоҳии   замин дар  вилоят  сари  вақт  анҷом  дода шуд.  Ҳоло  956 тухмипошак  ба  кор пурра тайёр  карда шудааст. Б.Домуллоев   зикр  намуд, ки то  имрӯз  на  ҳамаи  хоҷагиҳои  пахтакор  қарзҳои  аз бонкҳо  ва  сармоягузорон  гирифтаашонро баргардондаанд. Зеро  то  имрӯз  як  қисми  ҳосили  соли  гузашта ҷамъовардашуда  ба  фурӯш  нарафтааст. Б.Домуллоев  таъкид  намуд, ки   хоҷагиҳо  бояд  барои ба даст  овардани ҳосили  дилхоҳ   замин  ва  қарзҳои  гирифтаашонро  мувофиқи мақсад  ва оқилона  истифода баранд.  Ҳодисаҳое  мушоҳида  мешаванд, ки  баъзе  хоҷагиҳо   қарзҳояшонро  баргардонда  натавониста,  биноҳо,  техника ва  моликияти  дигарро  ба  фурӯш  мегузоранд. Мудири  филиали  шӯъбаи  «Агронинвестбонк»  дар  Хуҷанд  Аҳрорхон  Аҳроров  изҳор  намуд, ки  дар  мавриди   баргардонида нашудани  қарзи  хоҷагиҳо  фурӯши  моликияти онҳоро  мақомоти  суд ба  зимма  мегиранд.