МАҶЛИСИ НАВБАТИИ АГЕНТИҲОИ ИТТИЛООТИ ДАВЛАТИИ МАМЛАКАТҲОИ ИДМ

Душанбе,  2 март. (АМИТ «Ховар», Наталя  Михайлова). —  1 март дар  Боку  маҷлиси  навбатии  11 – уми  Шӯрои  роҳбарони   агентиҳои  иттилоотии   давлатии   мамлакатҳои  ИДМ  кушода шуд. Дар он  раиси  Шӯрои  роҳбарони  агентиҳои  иттилоотии  давлатии   мамлакатҳои  ИДМ,  директори  генералии  ИТАР _ ТАСС  Виталий  Игнатенко,  директори  генералии  Агентии  телеграфии  давлатии  Озарбойҷон  «Озартоҷ» Аслон Аҳмадӯғлӣ  Аслонов,  мудири  иҷроияи  агентии  иттилоотии  «Арманпресс»  Грайр Зорян,  раиси  Агентии  миллии  иттилоотии «Казинформ» — и  Қазоқистон Даурен  Диёров,  директори  генералии агентии  миллии  иттилоотии «Кабар» -и  Қирғизистон  Норин Айип,  директори  генералии  агентии давлатии иттилоотии  «Молдпресс» — и  Молдавия  Владимир  Дориё, директори  департаменти иттилоотию  таҳлилии Кумитаи  иҷроияи  ИДМ  Александр  Заварзин,  сардори шӯъбаи  иттилоот ва  пахши  ахбори  Кумитаи  иҷроияи  ИДМ  Игор  Григорев  иштирок  доранд. Аз  Тоҷикистон   дар  маҷлиси  мазкур   директори Агентии  миллии  иттилоотии  «Ховар»  Садриддин  Шамсиддинов  ширкат  меварзад. Иштирокчиёни  маҷлис   тадбирҳои  идонаи  бахшида ба  ҷашни  65 —  солагии  ғалаба дар   Ҷанги  Бузурги  Ватанӣ,   ташкили  озмуни  суратҳо  бахшида ба  иди  Ғалаба,  кушодани  саҳифаи  алоҳидаи  интернетӣ  бахшида ба   иди  Ғалаба,    тадбирҳои бахшида  ба  ҷашни  20 —  солагии  ИДМ,  нақшаҳои  тайёрӣ  ба  анҷумани  навбатии  Ассосиатсияи  ҷаҳонии  матбуоти  Русия  ва  масъалаҳои  дигарро  муҳокима  намуданд. Анҷумани    навбатии   ҷаҳонии  матбуоти  Русия  соли  равон  дар  Исроил  баргузор  хоҳад  гашт. Мухбири  АМИТ «Ховар»  ёдовар  мешавад,  ки  Шӯрои  агентиҳои давлатии  иттилоотии  ИДМ   айни  ҳол   Озарбойҷон,  Арманистон, Белорусия,  Қазоқистон, Қирғизистон,  Молдавия,  Русия ва  Тоҷикистонро  муттаҳид  менамояд.