МАҶЛИСИ НАВБАТИИ КОРШИНОСОНИ ИДМ

Душанбе,  2 март. (АМИТ «Ховар», Наталя  Михайлова). —  Имрӯз  дар  шаҳри  Минск   маҷлиси навбатии  гурӯҳи  коршиносони  ИДМ  баргузор  мегардад. Дар  он   матни   такмилдодашудаи   лоиҳаи    барномаи  ҳамкории  давлатҳои  ИДМ  дар  соҳаи  фарҳанг   муҳокима  карда  мешавад. Лоиҳаи  барномаро   гурӯҳи  кории   сиёсати  фарҳангии  давлатҳои  ИДМ  пешниҳод  намудааст. Дар  он  гуфта  мешавад, ки  ҳамкорӣ  дар  соҳаи  фарҳанг  ҷузъи  муҳимтарини   таъминоти  пешрафти  устувор  ва  самарабахши  иҷтимоию  иқтисодии  мамлакатҳои  ИДМ  мебошад. Ҳадафи  асосии  барнома  ба  вуҷуд  овардани  фазои  умумии   фарҳангӣ  ва  иттилоотии  давлатҳои  Иттиҳод  мебошад. Ҳуҷҷат  роҳу  усулҳои гуногуни  ҳамкории  мамлакатҳоро   барои  ҳифз  ва  истифодаи  ёдгориҳои таърихӣ,  осори  фарҳангии  ниёгон,  эҷодиёти  халқ,  беҳтар  сохтани  фаъолияти  осорхонаҳо,  китобхонаҳо,  ба  навор гирифтани  филмҳои нав,  офаридани  асарҳои  нави   мусиқию  тасвирӣ,  нашри  китоб,  илм,  маориф  ва  тайёр  намудани  кадрҳоро  пешбинӣ  менамояд.