МАШВАРАТИ БАЙНАЛМИЛАЛИИ ИҚТИСОДӢ

Душанбе,  5 март. (АМИТ «Ховар», Покиза  Маҳмадбекова). — Имрӯз  дар  Маскав машварати  навбатии  байналмилалии  иқтисодии  давлатҳои  аъзои  ИДМ  кушода  шуд. Дар  он  роҳу усулҳои амалӣ  сохтани  барномаи  стратегии  рушди  иқтисодии  Иттиҳоди  Давлатҳои  Мустақил  то  соли  2020  муҳокима  карда  мешавад.  Машварат  таҳти  унвони «Ташаббусҳои нав   дар  соли раёсати Федератсияи  Русия  дар  ИДМ»  гузаронида  мешавад. Дар  машварат  роҳбарони  мақомоти  ҳокимияти  давлатӣ,  созмонҳои  ҷамъиятӣ,  тиҷоратӣ  ва  бонкҳои  ИДМ  иштирок  доранд. Аз  Тоҷикистон  дар  машварат   намояндаи  доимии  ҷумҳурӣ  дар  ИДМ ва Ҷомеаи  иқтисодии  Евразия  Файзулло  Холбобоев  ва  аъзои Палатаи  савдо  ва  саноати  мамлакат  ширкат  меварзанд. Иштирокчиёни  машварат  масъалаҳои  ҳамкориро   дар  соҳаҳои   истеҳсоли  сӯзишворию  энергетика,  нақлиёт,  истеҳсоли  масолеҳи  бинокорӣ,  ҳамкории  молиявӣ,  истифодаи  технологияҳои  иттилоотӣ,  дорусозӣ,  биологӣ  ва  ғайраро  мавриди  баррасӣ  қарор  медиҳанд.