МОҲИ МАРТ СЕРБОРИШ МЕШАВАД

Душанбе,  11 март. (АМИТ «Ховар», Наталя  Михайлова). – Агентии  ҳавосанҷии  Тоҷикистон  пешгӯӣ  мекунад, ки   дар давоми  моҳи  март  дар  минтақаи  кӯҳистон боронҳои  шадид  ва  барфи  зиёд  меборад.  Миқдори  боришҳо  дар  давоми  моҳ  нисбат ба  шароити  муқаррарии  обу  ҳаво  ду баробар  зиёд   гардида  метавонад. Қайд  карда  мешавад, ки  ғафсии  қабати  барф  айни  ҳол  дар  сарчашмаи   дарёҳои  Панҷ, Вахш, Варзоб  ва  Зарафшон   нисбат ба  солҳои  гузашта  хеле  зиёд  мебошад. Ҳавосанҷҳо  пешгӯӣ  мекунанд, ки  бориши  зиёди  барфу  борон   ва  об  шудани  барф  дар  давоми  моҳҳои  марту  апрел  ва  ҳатто  май   сабаби  рух  додани  фалокатҳои гуногун   гардида  метавонанд. Аз  ҷумла,  дар  ағбаҳои  Анзоб,  Шаҳристон, минтақаи  Рашт  ва  ноҳияҳои  ғарбии  ВМКБ  фуромадани   барфу  тарма   пешгӯӣ  карда  мешавад.  Инчунин   дар   ноҳияҳои  Айнӣ,  Ховалинг,  Мӯъминобод,  Сангистон ва  Восеъ эҳтимоли   омадани  сел  ва обхезӣ  вуҷуд  дорад. Мухбири  АМИТ «Ховар»  хабар  медиҳад, ки  рӯзҳои  аввали  моҳи  март  дар  ноҳияҳои  Шуғнону Ишкошим ва  ағбаи  Шаҳристон бар  асари  фуромадани  тарма 4  нафар  ҳалок  гардид.