МУЛОҚОТИ ШУКУРҶОН ЗУҲУРОВ БО КУРБОНГУЛӢ БЕРДИМУҲАММАДОВ

 Душанбе, 18 март.(АМИТ «Ховар», Марзия Саидова).-Тақвияти ҳамкориҳои мутақобилан судманди парлумонии  Ҷумҳурии Тоҷикистон бо Туркманистон дар мулоқоти Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо Президенти  Туркманистон Қурбонгулӣ Бердимуҳаммадов 18 март дар Душанбе баррасӣ гардид. Раиси палатаи поёнии парлумони Тоҷикистон доир ба раванди баргузории интихоботи парлумонӣ дар Тоҷикистон ибрози назар карда, афзуд ки  интихоботи парлумонӣ дар Тоҷикистон дар сатҳи баланд,  шаффофу демократӣ ҷараён гирифт. Мавсуф шомил гардидани намояндагони 5 ҳизби сиёсиро ба парлумони касбии мамлакат нишонаи таҳкими раванди демократия дар Тоҷикистон арзёбӣ кард. Инчунин, Ш. Зуҳуров густариши муносибатҳои гуногунсоҳаро байни ду кишвари дӯст ва бародар муҳим маънидод кард. Президенти Туркманистон Қурбонгулӣ Бердимуҳаммадов   Шукурҷон Зуҳуровро  ба муносибати интихоб  гардиданаш ба мансаби Раиси палатаи поёнии парлумони Тоҷикистон табрик  намуд ва изҳори умедворӣ кард, ки дар оянда ҳамкории байнипарлумонии ҳар ду кишвар  ба марҳилаи нав ворид хоҳад гашт. Президенти Туркманистон соҳиби обрӯ ва нуфузи баланд шудани Тоҷикистонро  дар арсаи  байналмилалӣ натиҷа ва самараи талошҳои бесобиқаи парлумони ин кишвар арзёбӣ  кард ва иброз дошт, ки бешубҳа  дар ин самт  саҳми  вакилони  ин мақоми  олии қонунгузори Тоҷикистон муҳим аст.