НАРХИ ГӮШТУ ШИР ВА ТУХМ ЯК БАРОБАР КАМ МЕШАВАД

Душанбе, 11 март. (АМИТ «Ховар», Лаззат Диловарзод).- Дастгоҳи марказии Вазорати кишоварзӣ ва зерсохторҳои он ҳамаи чораҳоро мендешад, то нархи гӯшт, шир ва тухм як баробар дар соли 2010 арзон гардад,- иброз дошт сардори Раёсати чорводорӣ М.Мирзоев ба мухбири АМИТ «Ховар». Бо ин мақсад дар се соли охир Вазорати кишоварзӣ баҳри  рӯшди соҳаи чорводорӣ «Барномаи барқарорсозӣ ва рушди соҳаи парррандапарварӣ дар ҶТ барои солҳои 2007 — 2015», «Барномаи рушди соҳаи зотпарварӣ ва хушзоткунии чорво дар ҶТ барои солҳои 2008 2015» ва «Барномаи рушди кутоспарварӣ дар ҶТ  барои солҳои 2008 — 2015»- ро таҳия намуд, ки  бо қарори  Ҳукумати ҷумҳурӣ тасдиқ гардиданд. Таҳияи ин барномаҳо имкон медиҳад, ки аҳолии ҷумҳурӣ дар давоми соли ҷорӣ бо гӯшт, шир ва тухми арзони истеҳсол кардашудаи  хоҷагиҳои чорвопарвари ҷумҳурӣ таъмин гардида, ҳатто дар содироти он ба кишварҳои ҳамсоя мувафақ шаванд.