ПРЕЗИДЕНТИ ТУРКМАНИСТОН ДАР ДОНИШГОҲИ ДАВЛАТИИ ТИББИИ ТОҶИКИСТОН

Душанбе, 18 март. (АМИТ «Ховар», Фарангис Раҳимова). – Президенти Туркманистон Қурбонгулӣ Бердимуҳаммадов баъди чошти имрӯз зимни сафари давлатиаш ба Тоҷикистон ба Донишгоҳи давлатии тиббии ба номи Абуалӣ ибни Сино рафта, бо омӯзгорону донишҷӯёни он мулоқот кард. Сардори давлати Туркманистонро дар донишгоҳ Вазири тандурустии Ҷумҳурии Тоҷикистон Нусратулло Салимов ва ректори донишгоҳ Убайдулло Қурбонов пешвоз гирифтанд. Дар фарҷоми мулоқот ба Президенти Туркманистон унвони профессори ифтихории ДДМТ ба номи Абуали ибни Сино дода шуд. Мухбири АМИТ «Ховар» ёдовар мешавад, ки Қ. Бердимуҳаммадов соли 1995 дар вазифаи директори Маркази бемориҳои дандони Вазорати тандурустӣ ва саноати тиббии Туркманистон кор мекард. Вай соли 1997 вазири тандурустӣ ва саноати тиббии Туркманистон ва соли 1998 директори Маркази байналмилалии тиббии ба номи Сафармурод Ниёзов таъин гардид. Мавсуф соли 2001 муовини сарвазир таъин гардида, аввал ба ҳалли масъалаҳои тандурустӣ, маориф ва илм ва баъдан ба ҳалли масъалаҳои фарҳанг ва воситаҳои ахбори оммавӣ сарпарастӣ мекард. Қ. Бердимуҳаммадов моҳи декабри соли 2006 иҷрокунандаи муваққатии вазифаи Президенти Туркманистон гардида, моҳи феврали соли 2007 Президенти мамлакат, раиси Ҳукумат, Сарфармондеҳи олии Қувваҳои мусаллаҳи Туркманистон интихоб шуд. Ӯ унвони ҳарбии генерали артиш дошта, доктори илми тиб ва академики Академияи илмҳои Туркманистон мебошад.