РОҲИ ДУШАНБЕ – ХУҶАНД КУШОДА ШУД

Душанбе,  5 март. (АМИТ «Ховар»,  Кристина  Эрлих). —  Рафту  омади  нақлиёт  дар   роҳи  мошингарди  Душанбе – Хуҷанд  соати  12  — и  5  март  аз  нав  пурра  барқарор  карда  шуд. Сардори  шӯъаи  Вазорати  нақлиёт  ва  коммуникатсияи  ҷумҳурӣ  Владимир  Багуманов  ба  АМИТ «Ховар»  хабар  дод, ки  бо  мақсади  таъмини  бехатарии  ҳаракат,   мошинҳо  айни  ҳол  танҳо  аз  Душанбе  ба  самти  Хуҷанд  ҳаракат  мекунанд.  Ҳаракати  нақлиёт аз  ҷониби  Хуҷанд  ба  самти  Душанбе   аз  рӯи  ҷадвали муайян  иҷозат  дода  мешавад.  Ҳаракати  нақлиётро  дар  роҳи  мазкур   кормандони  Идораи  бозрасии  давлатии  автомобили  Вазорати  корҳои  дохилӣ  ба  низом  медароранд. Бояд  гуфт, ки  шаби  гузашта  дар километри  65 – уми  роҳи  мазкур   якбора  дар  чанд  ҷой  тарма   фуромад. Дар натиҷа  тақрибан  60 мошини  боркашу  сабукрав   дар  иҳотаи  барфу  тарма  монд.  Бо  ҳамин  сабаб   роҳ  баста  шуд.  В.Багуманов   зикр намуд, ки  ба  туфайли   амалиёти  таъҷилию самарабахши   муассисаҳои  ҳифзу  муроқибати роҳ  ҳаракати нақлиёт аз нав  пурра  барқарор  карда  шуд.