САНДАЛӢ САБАБИ БА АМАЛ ОМАДАНИ СӮХТОР ГАШТ

Душанбе, 1 март. (АМИТ «Ховар», Жасмин Назарова). – Ҳафтаи сипаришуда дар миқёси ҷумҳурӣ 13 ҳодисаи сӯхтор бо хисороти молии умумии 20 ҳазору 230 сомонӣ ба қайд гирифта шудааст. Тибқи иттилои корманди маркази матбуоти Сарраёсати хадамоти давлатии оташнишонии ВКД ҶТ Толиб Ҳаётов, масоҳати умумии сӯхторҳо 409 метри мураббаъро ташкил медиҳад. Чун ҳарвақта сабабҳои асосии ҳодисаҳои нохуш – муносибати беэҳтиётона бо оташ, вайрон кардани қоидаҳои бехатарӣ аз сўхтор ҳангоми истифодаи асбобҳои гармидиҳандаи барқӣ ва газӣ, расиши кӯтоҳи ноқилҳои барқӣ мебошанд. Дар давоми ҳафта дар вилояти Суғд – 7, вилояти Хатлон – 4, шаҳри Душанбе – 1, ноҳияи Рӯдакӣ — 1 ҳодисаи сӯхтор ба қайд гирифта шудааст. Чунин ҳодиса аз беэҳтиётона истифода бурдани сандалӣ сабаби ба амал омадани сӯхтор дар манзили истиқоматии шаҳрванд Ғолибҷон Қаюмов истиқоматкунандаи ноҳияи Ҷ. Расулови вилояти Суғд, гашт. Ҳангоми сӯхор дар масоҳати 35 метри мураббаъ молу амволи хона сӯхта зарар дид. Тафтиш муайян намуд, ки гунаҳкор соҳибхоназан Муҳайё Қаюмоваи 21 сола буда, зарар аз сӯхтор 2 ҳазору 100 сомониро ташкил медиҳад.