СОҲИБКОРОНИ «ПАНҶШАНБЕ» ДАР ХАРИДОРОИИ САҲМИЯҲО ФАЪОЛАНД

Суғд, 5 март. (АМИТ «Ховар», Мирзалӣ Амонов, Самад Юсуфӣ).-Аҳли бозори марказии шаҳри Хуҷанд — «Панҷшанбе» аз Муроҷиатномаи Президенти мамлакат Эмомалӣ Раҳмон оид ба харидории саҳмияҳои Нерӯгоҳи барқи обии «Роғун»-ро якдилона пуштибонӣ намуда, аз рӯзи нахустини ба фурӯш баромадани саҳмияҳо то имрӯз мунтазам харидорӣ менамоянд. 4 март гурӯҳи калони соҳибкорон ва фурӯшандагони бозори «Панҷшанбе» барои харидории навбатии саҳмияҳои ин иншооти тақдирсоз, ба намоиши саҳмгузорӣ ҷиҳати вусъат бахшидани сохтмони ин нерӯгоҳ баромада, ба маблағи зиёда аз 40 ҳазор сомонӣ саҳмия ва сертификатҳои ҶСК НБО «Роғун»-ро хариданд. Маврид ба зикр аст, ки соҳибкорони бозори «Панҷшанбе» бунёди нерӯгоҳи «Роғун»-ро ору номуси ҳар фарди миллатдӯст ва ояндаи дурахшони кишвар дониста, то имрӯз ба маблағи 700 ҳазор сомонӣ саҳмия ва сертификатҳои ин иншооти муҳими асрро харидорӣ намудаанд.