ТӮҲФАҲОИ НАВРӮЗӢ БА МАКТАБ-ИНТЕРНАТ

Душанбе,  26  март. (АМИТ «Ховар», Ибодат Давлатова).-   Бо ташаббуси Хадамоти  муҳоҷирати Вазорати корҳои дохилии Ҷумҳурии Тоҷикистон ба муносибати ҷашни наврӯзи хӯҷастапай ба мактаб — интернати   ятимону бепарасторон ва кӯдакони аз оилаҳои камбизоати ноҳияи Ёвони вилояти Хатлон кӯмаки хайрия расонида шуд. Тавре ба мухбири АМИТ «Ховар» аз Хадамоти  муҳоҷирати ВКД ҶТ иттилоъ доданд,  дар арафаи ҷашнгирии ин иди баҳор ҳайати шахсии кормандони Хадамоти муҳоҷират барои амалӣ намудани ин кори хайру савоб маҳсулоти хӯрокворӣ аз қабили 30 халта орд, 5 халта шакар, 65 кило равған, гӯшту макарон ва дигар маҳсулоти заруриро, ба маблағи 4 ҳазору 500 сомонӣ харидорӣ намуда, ба мактаб — интернати мазкур супориданд. Инчунин дар таҷлили ин ҷашни бошукӯҳ аз ҷониби ҳайати шахсии кормандони Хадамоти муҳоҷират ба боғчаи бачагонаи №17-и ноҳияи Шоҳмансур кӯмаки хайрия расонида шуд.  Ба ин боғчаи бачагона маҳсулоти озуқавории равған, гӯшту асал, шириниву кулчақандҳо, сабзавоту афшураи мева ва  ғайра, ки ҳаҷми умумии он 1 ҳазору 700 сомониро ташкил мекард, кӯмак расониданд.