ТАРҲРЕЗИИ БАРНОМАИ ЭНЕРГЕТИКИИ КИШВАР

Душанбе,19 март. (АМИТ «Ховар», Лаззат Диловарзод).- Бино ба маълумоти Пажӯҳишгоҳи «Нурофар» дар Ҷумҳурии Тоҷикистон барномаи рушди энергетикӣ дар оғози солҳои 90 – уми асри гузашта тарҳрезӣ шуда буд, ки   он бунёди нерӯгоҳҳои азими обиро  дар солҳои 1991 – 2005 пешбинӣ карда  буд. Дар асоси барномаи мазкур, бояд низоми энергетикии ҷумҳурӣ беш аз 5 маротиба афзоиш меёфт. Мӯҳлати пешбинишуда, бо рукуди давр амалӣ нашуд. Имрӯз, ки чунин шароит фароҳам омадааст, амалӣ шудани он танҳо  ба манфиати кор аст, — мегӯяд корманди Пажӯҳишгоҳ Сайдалӣ Тоҳиров. Мутобиқи нақшаи мазкур, танҳо дар дарёи Панҷ 13 нерӯгоҳ, ки иқтидори умумии онҳо аз 300 то 4 ҳазор МгВт буда, дар як сол 80,6 млрд. кВт соат нерӯи барқ истеҳсол мекунанд, пешбинӣ гардидааст. Калонтарини онҳо НБО –и  «Даштиҷум» мебошад, ки иқтидораш 4 ҳазор мВт  ва ғунҷоиши обанбораш 17, 6 км3 –  ро  ташкил медиҳад.