ҚАРЗ БАРОИ РУШДИ ТИҶОРАТ

Душанбе,  2 апрел. (АМИТ «Ховар», Покиза  Маҳмадбекова). – Соли  2009  таҳти таъсири  бӯҳрони  ҷаҳонии  молиявӣ ва  коҳиш  ёфтани  интиқоли  пул   аз  хориҷи  кишвар  Ҷамъияти  саҳҳомии  «Бонки Эсхата»  низ  муомилоти  пулро   нисбат ба  соли  2008 то  андозае  кам  кард.  Дар  ин  давра  маблағи  пули  ба  аҳолӣ додашуда  бештар  аз 370  миллион   доллари  ИМА – ро ташкил  намуд, ки   нисбат ба  соли  2008 – ум  19,6  фоиз  кам   мебошад. Бо  вуҷуди  ин  маблағи  пасандози  аҳолӣ  дар  бонк  соли  2009  қариб  92  миллион  сомониро   ташкил  дод, ки   аз  соли  2008 тақрибан  50  фоиз   зиёд  аст. Маблағи  сармояи   бонк  охири  соли  2009  бештар  аз 51  миллион  сомонӣ  буд. Дар  ин  давра   маблағи  дар  муомилотбудаи  бонк 13  фоиз  афзуда,  ба  бештар  аз  297  миллион  сомонӣ  расид. Даромади  Бонк  соли  2009 3,3  миллион  сомониро ташкил  дод, ки  нисбат ба  соли  2008  камтар  мебошад. Соли  гузашта Бонки  Эсхата   маблағи  барои   додани  қарз  пешбинишударо  3  фоиз  зиёд  намуд. Аз  ин  ҳисоб   соли  2009  — ум  50,1  миллион  сомонӣ   фоида  ба  даст  оварда шуд.   Бештар  аз  70  фоизи  маблағи  барои  қарз  пешбинишуда  барои   рушди  соҳаи  савдо  ва тиҷорат  сарф  гардид.