АНҶОМИ САФАРИ РАСМИИ ЗАРИФӢ БА ХИТОЙ
Душанбе, 30 апрел. (АМИТ «Ховар», Фарангис Раҳимова). — Дирӯз, 29 апрел Вазири корҳои хориҷии Ҷумҳурии Тоҷикистон Ҳамрохон Зарифӣ ҳангоми бозгашт аз Пекин дар шаҳри Урумчӣ бо Раиси Ноҳияи мухтори Синзяну Уйғури Ҷумҳурии Халқии Хитой Нур Бекрӣ мулоқот анҷом дод. Дар рафти сўҳбат сатҳи ҳамкориҳои дуҷонибаи Ҷумҳурии Тоҷикистон ва Ҷумҳурии Халқии Хитой мавриди баррасӣ қарор гирифта, ба масъалаи табодули мол миёни Тоҷикистону Ноҳияи мухтори Синзяну Уйғури ин кишвар, ки ҳамсояи Тоҷикистон аст, аҳамияти хоса зоҳир гардид. Ҷонибҳо иброз доштанд, ки ҳаҷми асосии муомилоти мол миёни Тоҷикистону Хитой ба ин ноҳия рост меояд ва бо мавриди истифода қарор гирифтани гузаргоҳи сарҳадии Кулма додугирифти мол миёни ду давлат ба таври назаррас афзуд. Таъкид гардид, ки дар оянда имкониятҳои гузаштани мол тавассути ин гузаргоҳ васеъ гардида, мўҳлати фаъолияти он дар давоми сол дарозтар хоҳад шуд. Ҳамрохон Зарифӣ ва Нур Бекрӣ дар бобати тавсеа бахшидани ҳамкориҳои техникӣ ва фарҳангӣ низ мубодилаи афкор намуданд. Бегоҳии ҳамон рўз Вазири корҳои хориҷии Ҷумҳурии Тоҷикистон бо анҷом ёфтани сафари расмиаш ба Ҷумҳурии Халқии Хитой, ки хеле самаранок сурат гирифт, ба Душанбе баргашт. Дар ин бора ба АМИТ «Ховар» аз Вазорати корҳои хориҷӣ хабар доданд.
Масъалаҳои татбиқи «Барномаи давлатии рушди телевизион ва радио» дар муҳокимаи парламентӣ баррасӣ шуданд
Паёмҳои Президенти Тоҷикистон ба Маҷлиси Олӣ ҳамчун санади муҳими барномавии давлатӣ арзёбӣ мешаванд
Ҷашни Сада дар Донишгоҳи байналмилалии сайёҳӣ ва соҳибкории Тоҷикистон ботантана таҷлил гардид
Имрӯз дар ноҳияҳои алоҳидаи Тоҷикистон туман мефарояд
Имрӯз дар якчанд вазорату идораҳо нишастҳои матбуотӣ баргузор мегарданд
Низом Мирзозода: «Шаҳрвандон пеш аз хариди манзил фаъолияти ширкатҳои сохтмониро тавассути QR-код санҷанд»
Имрӯз дар Тоҷикистон ҳавои тағйирёбанда пешгӯӣ мешавад
Имрӯз дар Тоҷикистон бориши борон ва барф пешгӯӣ мешавад
