БА ОИЛАҲОИ КАМБИЗОАТ САҲМИЯ ТӮҲФА НАМУДАНД

Суғд, 7  апрел.(АМИТ «Ховар», Мирзалӣ Амонов).- Сокинони ноҳияи Б.Ғафуров аз аввали ба фурӯш баромадани саҳмияҳои ҶС ШК НБО « Роғун» муташаккилона харидорӣ менамоянд. Ҳамин тавр дар яке аз ҷамоатҳои калонтарини ноҳия-ҷамоати Ёва мардум барои харидории саҳмияҳо ба масҷиди «Бурхи Сармасти Валӣ» омаданд.             Тавре, ки раиси  ҷамоати Ёва Ҳотам Фаттоев ба мо иттилоъ дод, ҷамоат аз 35 кумитаву маҳалла иборат буда, 39 ҳазор нафар аҳолӣ зиндагӣ мекунад ва то имрӯз ба маблағи 1,5 миллион сомонӣ саҳмия ва сертификатҳои Роғунро харидорӣ намуданд.             Дар ин маърака раиси ноҳия Лутфулло Муҳиддинов ширкат варзида аз номи мақомоти иҷроияи ҳокимияти давлатии ноҳия ба 5 оилаи камбизоат саҳмияҳои НБО «Роғун»-ро тақдим намуд.