ЧАРО ДАРОМАДИ БУҶЕТ ТАЪМИН НАГАРДИД?

Душанбе, 26 апрел. (АМИТ «Ховар», Бекназари Абӯбакр). — Дар давоми се моҳи аввали соли ҷорӣ ҳаҷми Маҷмӯи Маҳсулоти Дохилӣ афзоиш ёфта, рушди реалии он ба 6,8 фоиз баробар гардид, ки ин нисбат ба ҳамин давраи соли гузашта 3,3 фоиз зиёд мебошад. Дар ин бора 26 апрел вазири молияи ҷумҳурӣ Сафаралӣ Наҷмиддинов дар нишасти матбуотӣ иттилоъ дод. Ӯ афзуд, ки ҳаҷми номиналии Маҷмӯи Маҳсулоти Дохилӣ 3,9 млрд. сомониро ташкил дода, нисбат ба ҳамин давраи соли гузашта афзоиши номиналии он ба 20,5 фоиз баробар гардид. Ба буҷети давлатӣ дар се моҳи аввали соли равон зиёда аз 1 млрд. сомонӣ маблағ ворид карда шуд, ки ин нисбат ба ҳамин давраи соли гузашта 158,0 млн. сомонӣ зиёд аст. «Даромади буҷет аз рӯи андозҳои дохилӣ дар ин давра ба андозаи 108,4 фоиз иҷро шуда, ба буҷет зиёда аз 618,0 млн. сомонӣ маблағ ворид гардид, ки ин аз нақша 48,0 млн. сомонӣ ва нисбати соли гузашта 139,0 млн. сомонӣ зиёд мебошад. Ба буҷети суғуртаи иҷтимоӣ ва нафақа аз ҳисоби андози иҷтимоии корхонаҳои ғайрибуҷетӣ 118,0 млн. сомонӣ ворид гардид, ки он 101,7 фоизи нақшаро ташкил дода, нисбат ба ҳамин давраи соли гузашта 16,0 млн. сомонӣ зиёд шуд», — гуфт вазир. Ғайр аз ин, аз ҳисоби маблағҳои махсус 46 млн. сомонӣ, маблағҳои грантӣ ва қарзии ташкилотҳои байналмилалӣ зиёда аз 100 млн. сомонӣ ва қарзи давлатӣ 44 млн. сомонӣ ба буҷет ворид гардид, ки бо назардошти ин сарчашмаҳо даромади умумии буҷети давлатӣ дар се моҳи соли ҷорӣ 95,5 фоиз иҷро гардида, воридоти он қариб 1,2 млрд. сомониро ташкил медихад. Даромади буҷети ҷумҳуриявӣ дар се моҳи якуми соли ҷорӣ 85 фоизи нақшаро ташкил дода, ба буҷет 100 млн. сомонӣ маблағ кам ворид гардид. Воридоти ками буҷет асосан аз рӯи пардохтҳои гумрукӣ ба вуҷуд омадааст.