ДАР ПАРЛУМОНИ ҶОПОН ГУРӮҲИ ДӮСТӢ БО МН СОЗМОН ДОДА ШУД

Душанбе. 30 апрел. (НИАТ «Ховар», Марзия Саидова).-Масъалаҳои тақвияти ҳамкории гуногунсоҳаи байни Ҷумҳурии Тоҷикистон ва Ҷопон зимни мулоқоти Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо намояндаи ваколатдори Сафорати Ҷопон дар Ҷумҳурии Тоҷикистон Йошихиро Накаяму дар Душанбе баррасӣ гардиданд, Ш. Зуҳуров ба дипломатии ҷопонӣ доир ба сохтори феълии палатаи поёнии парлумони Тоҷикистон ва нақши он дар таҳияи қонуну санадҳои ба манфати ҷомеа нигаронида шуда, маълумот дод. Мавсуф афзуд, ки нақши Ҳукумати Ҷопон дар татбиқи як қатор лоиҳаҳои иҷтимоию иқтисодии Тоҷикистон назарррас буда, Ҳукумати Ҷопон доимо иқдомҳои Ҳукумати Ҷумҳурии Тоҷикистонро ҷонибдорӣ менамояд. Мусоҳибон ҳамзамон доир ба таҳкими равобити байнипарлумонии ҳар ду кишвар табодули назар карданд. Намояндаи ваколатдори Сафорати Ҷопон дар Ҷумҳурии Тоҷикистон афзуд, ки дар парлумони Ҷопон, ки аз ду палата иборат  аст,  гурӯҳи дӯстию ҳамкорӣ бо парлумони Тоҷикистон созмон дода шудааст, ки ба тақвияти минбаъдаи робитаҳои байнипарлумонии ҳар ду кишвар заминаи  мусоидро фароҳам меорад. Ҷонибҳо ҳамзамон,  масъалаҳои дигари мавриди таваҷҷӯҳи тарафайнро мавриди баррасӣ қарор доданд.