ДЕҲҚОНОНИ АФҒОН БА ПАРВАРИШИ ЗИРОАТ ҶАЛБ КАРДА МЕШАВАНД

Душанбе,  13 апрел. (АМИТ «Ховар»). —  Муассисаи ҷаҳонии  озуқа ва Раёсати  мубориза  ба  муқобили   маводи  нашъадор ба  ҷиноятҳои  СММ дар  байни 700  нафар  сокини деҳаҳои  вулусволии Хосони  вилояти  Ҳилманд  60 тонна  озуқа тақсим  намуданд. Ин  иқдом  дар  доираи барномаи   мубориза ба  муқобили  парвариши  зироатҳои  нашъадор дар  мамлакат  амалӣ  карда  шуд. Вулусволии  Хосон  дар наздикии  сарҳади  Эрон  воқеъ  буда,  чанде  пеш  минтақаи  бемаводи  нашъадор  эълон  карда  шуд. Вале   проблемаи  бекорӣ  дар  ин  минтақа  то  ҳол  ҳал  нашудааст. Зеро  минтақаи  мазкур   нисбатан  камоб   мебошад. Сокинони он  ба  вилоятҳои  ҳамсоя  рафта,  ба  парвариши  кӯкнор  ва  зироатҳои  дигари  нашъадор  машғул  мешаванд. Ба  онҳо барои  корашон  дар  як  рӯз  то  500  афғонӣ  музди  кор  дода  мешавад.  Раёсату  шӯъбаҳои  СММ  кӯшиш  мекунанд, ки  деҳқонони  маҳаллии  афғонро  ба  парвариши  навъҳои дигари   зироат,  аз  ҷумла  ғалла ва  сабзавот  водор  созанд. Барои  ин  киштзори  зироатҳо  барқарор  ва  ҷӯю  каналҳо  тармим  карда  мешаванд. Мувофиқи  маълумоти  дафтари  матбуоти  СММ, дар  Афғонистон  қариб  90  фоизи  маводи  нашъадори  тамоми  ҷаҳон  истеҳсол  карда  мешавад.  Маводи  нашъадор,  аз  ҷумла  бангдона  ва героин   аз  Афғонистон ба  Русия, мамлакатҳои  Аврупо,  Ҳиндустон  ва  Чин  паҳн  карда  мешавад. Ҳаҷми  интиқоли  маводи  нашъадор  аз  Афғонистон  ба  хориҷи  кишвар  дар  як  сол  900  тонна  банг  ва  350 тонна  героинро  ташкил  медиҳад. Қисми  зиёди  маблағи  фурӯши  маводи  нашъадор  барои таъминоти  созмонҳои террористӣ   сарф  карда  мешавад.  Даромади  умумии  мафияи нашъа  аз  ҳисоби  фурӯши   маводи  нашъадори  Афғонистон  дар  як  сол  қариб ба  65  миллиард  доллари  ИМА  мерасад.