Э.РАҲМОН: «ҲАР ЯК ФАРД БОЯД ХУДРО ОЗОД ҲИС КУНАД»

Душанбе, 24 апрел.(АМИТ «Ховар», Марзия Саидова).-«Мову шумо вазифадорем, ки доир ба адои рисолати ниҳоят муҳим таҳия, қабул ва такмили қонунҳо заминаи қонунгузориро таҳким бахшида, пеш аз ҳама ҳуқуқу озодиҳои инсонро дар давлати  соҳибихтиёри худ ҳамчун арзиши олӣ ҳифз ва таъмин намоем», зикр кард Президенти  Ҷумҳурии Тоҷикистон Эмомалӣ Раҳмон дар Паёми худ ба Маҷлиси Олии Ҷумҳурии Тоҷикистон 24 апрели соли 2010. Президенти мамлакат зимни Паёми навбатии худ ба Маҷлиси Олӣ афзуд, ки мақсади асосии сиёсати иқтисодии давлати Тоҷикистон ба роҳ мондани рушди устувори иқтисодӣ буда, тамоми нақшаҳои Ҳукумати Ҷумҳурии Тоҷикистон дар чаҳорчӯбаи се ҳадафи стратегӣ- таъмини истиқлолияти энергетикӣ, раҳоӣ аз бунбасти коммуникатсионӣ ва ҳифзи амнияти озуқаворӣ таҳрезӣ шудаанд ва амалӣ карда мешаванд. Ҳадафҳои зикршуда, инчунин ҳимояи манфиатҳои  миллӣ, ҳифзи дастовардҳои истиқлолият, суботи сиёсию иҷтимоӣ ва таҳкими ваҳдати миллӣ муайянкунандаи самтҳои фаъолияти Президент, Маҷлиси Олӣ, Ҳукумати  Ҷумҳурии Тоҷикистон, мақомоти иҷроияи ҳокимияти давлатии вилоятҳо ва шаҳру ноҳияҳо, сохторҳои худидоракунии маҳаллӣ, корхонаю муассисаҳои давлативу ғайридавлатӣ, инчунин аҳзоби сиёсӣ ва иттиҳодияҳои ҷамъиятӣ ва институтҳои ҷомеаи шаҳрвандӣ мебошанд.