КОМИССАР ЗАБОНИ ЛӮЛИЁНРО ЁФТ

Душанбе, 22 апрел. (АМИТ «Ховар», Лаззат Диловарзод).- Дар 2 ҷамоати деҳоти ноҳияи Восеъ бештар аз 2 ҳазор оилаҳои лӯлиён зиндагӣ мекунанд, вале то замони мустақилияти ҷумҳурӣ  ягон лӯлӣ ба сафи армия ба хизмат даъват намешуд. Аз баски лӯлиён шиноснома надоранд ва дар қайди ҷойи зист ба ҷойи писар духтар мегузаранд, даъваташон ба сафи қувваҳои мусаллаҳ мушкилот меорад. Ба гуфти сардори Комиссариати ҳарбии ноҳияи Восеъ Зубайдулло Абдуллоев, бо даъвати навбатӣ, ки аз 1- уми апрели соли ҷорӣ оғоз ёфтааст, чанд вақт кормандон миёни лӯлиҳо тарғибу ташвиқи хизмат ба ватанро ба роҳ монданд. Он натиҷаи хуб дод, лӯлиён худашон розӣ шуданд, ки барои хизмат ба комиссариати ноҳия ҳозир шаванд. Талаби лӯлиҳо ин аст, ки онҳоро барои хизмати ҳарбӣ танҳо ба пойтахт фиристанд. Комиссариати ҳарбии ноҳияи Восеъ бори аввал 40 нафар лӯлиёни ду ҷамоати ноҳияи  Восеъро ба сафи қувваҳои мусаллаҳ даъват кардааст. Агар  лӯлиёни даватшаванда хизматро бе қонуншиканӣ анҷом диҳанд, минбаъд ҳамаи онҳо соҳиби шиноснома ва ҷойи қайди доимӣ гардида,  баробари дигар шаҳрвандони Тоҷикистон ба хизмати аскарӣ гирифта мешаванд, — иброз дошт З. Абдуллоев.