КОНФРОНСИ БАЙНАЛХАЛҚӢ БАХШИДА БА ПРОБЛЕМАҲОИ ОБ

Душанбе,  30 апрел. (АМИТ «Ховар», Фарангис  Раҳимова). —  Аз  8  то  10  июни  соли равон  дар  Душанбе  конфронси  байналмилалӣ  бахшида ба  ҷараёни  иҷрои тадбирҳои   марбут ба   даҳсолаи байналхалқии амалиёти  «Об  барои  ҳаёт» баргузор  мегардад.  Ташкилкунандагони  он  Ҳукумати  Ҷумҳурии  Тоҷикистон  ба  Созмони  милали  муттаҳид  мебошанд. Ҳукумати  Ҷумҳурии  Тоҷикистон  бо  мақсади  омода  сохтан  ва  гузаронидани  конфронс  таҳти роҳбарии  Сарвазири  мамлакат  кумитаи  тадорукот  созмон  дод. Вазири  корҳои  хориҷии  ҷумҳурӣ  муовини  роҳбари  кумитаи  тадорукот  мебошад. Ба  ҳайати он  роҳбарони  вазорату  идораҳои   дахлдор  шомил  гардиданд. Ҳадафи  асосии  конфронс ҷамъбасти  натиҷаҳои   даври  аввали  Даҳсолаи  байналхалқии  амалиёти  «Об  барои  ҳаёт»,  таҳлили  амалӣ  сохтани тадбирҳои  қаблан  мувофиқашуда дар  сатҳи  байналмилалӣ,  инчунин  муқаррар  намудани   тадбирҳои ояндаи   марбут ба   масъалаҳои об то  соли  2015 мебошад. Дар  конфронс  роҳбарони   аввали   мамлакатҳои  ҷаҳон  ва  намояндагони  баландпояи  сохзмонҳои  байналмилалию  минтақавӣ,  ғайридавлатӣ ва  илмӣ  иштирок  хоҳанд  кард.           Ҳукумати  Тоҷикистон  ба  унвони   сарони  ҳукуматҳои  191   мамлакати  аъзои  СММ,  роҳбарони  20 ташкилоти  Созмони  Милал,  зиёда  аз  80  ташкилоти  байналхалқию  минтақавӣ  ва  120 муассисаи   илмию  таълимии  мамлакатҳои  ҷаҳон  барои  иштирок  дар  конфронс  даъватнома  фиристод