МАҶЛИСИ ШӮРОИ РОҲБАРОНИ КУМИТАҲОИ ҶАВОНОНИ ИДМ

Душанбе,  14 апрел. (АМИТ «Ховар», Наталя  Михайлова). —  Дирӯз  дар   шаҳри  Боку  маҷлиси  навбатии  Шӯрои  роҳбарони  кумитаҳои  ҷавонони  давлатҳои  ИДМ  кушода  шуд.  Дар он   намояндагони  Озарбойҷон,  Русия,  Тоҷикистон,  Белорусия, Қазоқистон ва  Молдавия  иштирок доранд. Аз  Тоҷикистон  дар  маҷлис  раиси  Кумитаи ҷавонон,  варзиш ва  сайёҳии  назди  ҳукумати  мамлакат  Маликшо  Неъматов  ширкат  меварзад. Вазири  масъалаҳои  ҷавонон  ва  варзиши  Озарбойҷон   Озод  Раҳимов   маҷлисро  кушода,  дар  бораи  масъалаҳои  рӯзномаи он   сухан  ронд. Вай  зикр  кард, ки  мо   на  танҳо  ҳамсояҳои  ҳамдигар  мебошем,  балки бо  давраи  муайяни  таърихи   умумӣ ва  арзишҳои   ягонаи   иҷтимоию  фарҳангӣ  бо  ҳамдигар  шарик  мебошем. Ин  барои   ба  роҳ  мондани  муносибатҳои  ҳамаҷониба  ва  ҳамкории  мутақобилан  муфид  заминаи  мусоид  мебошад. Ҳукуматҳои  мамлакатҳоямон,  кумитаи  иҷроияи  ИДМ  ва  сохторҳои он  барои  мустаҳкам  намудани  мавқеи  ИДМ  ҳамчун   сохтори  байнидавлатӣ  кӯшиш  ба  харҷ  медиҳанд. Вазифаи  мо  мусоидат   ба  амалӣ  гардидани  ин  тадбирҳо  мебошад. Иштирокчиёни  маҷлис  нақшаи  тадбирҳои  муштаракро барои  ду  соли  оянда  тарҳрезӣ  намуданд. Шӯрои  роҳбарони  созмонҳои  ҷавонони  давлатҳои  ИДМ  соли  2005  бо  қарори  сарони  ҳукуматҳои  ИДМ  ташкил  ёфта буд.  Маҷлисҳои он  ҳар  сол  ду  маротиба  гузаронида  мешаванд.