МУЛОҚОТИ РОҲБАРОНИ ДАСТГОҲҲОИ ПАЛАТАҲОИ ПАРЛУМОНҲОИ ИДМ

Маскав,  23 апрел. (АМИТ «Ховар», Ҳалима  Хушқадамова). —  22  апрел  дар  Шӯрои Федератсияи  Русия   мулоқоти роҳбарони  дастгоҳҳои  палатаҳои  болой  ва  поёнии  парлумонҳои  давлатҳои  ИДМ  кушода шуд. Раиси  Шӯрои  Федератсия  Сергей  Миронов  дар оғози  мулоқот  зикр  кард, ки  он  дар  арафаи  воқеаи  муҳим – ҷашни  65 – солагии  Ғалаба  дар  Ҷанги  Бузурги  Ватанӣ  баргузор  мегардад. Сипас  Муншии  умумии  Ассамблеяи  байнипарлумонии  ИДМ Михаил Кротов  дар  бораи  низоми  мавҷудаи  муносибатҳо  ва  ҳамкории   котиботи  Ассамблея  ва   дастгоҳҳои  парлумонҳои   мамлакатҳои  ИДМ  дар  бобати  таҳия  ва  қабули   қонунҳо,  самтҳои  гуногуни   равобити  байнипарлумонӣ  дар  доираи  ассамблея, аз  ҷумла,  фаъолияти  мушоҳидон  дар  интихоботҳо  ва  ҳамкорӣ  бо  созмонҳои байналмилалӣ  сухан  ронд. Дар  ҷараёни  мулоқот роҷеъ ба масъалаи  беҳтар  сохтани  фаъолияти  парлумонҳо  ва  роҳҳои ҳамкории  самарабахши  онҳо  табодули назар  карда шуд. Мухбири  АМИТ «Ховар»  хабар  медиҳад, ки  дар  мулоқот   роҳбарону  намояндагони  парлумонҳои  Украина, Озарбойҷон, Арманистон,  Белорусия ва  Қазоқистон  иштирок  доштанд. Бо  сабаби  он  ки  дар  Тоҷикистон  23  апрел  Иҷлосияи  нахустини  Маҷлиси  миллии  Маҷлиси  Олӣ  баргузор  мегардад,   дар  мулоқоти  мазкур  намояндагони он  иштирок  надоранд.