Н.БОРДЮЖА ДАР БОРАИ ВАЗЪИЯТИ ҚИРҒИЗИСТОН

Душанбе,  8 апрел. (АМИТ «Ховар»). —  Муншии  умумии  Созмони  аҳдномаи  амнияти  дастаҷамъӣ  Николай  Бордюжа  зимни  сӯҳбат бо  мухбири   Агентии  иттилоотии  «24 кг» изҳор  намуд, ки  ҳамаи  мамлакатҳои  аъзои  созмон  аз вазъияти  дар  Қирғизистон  рухдода  изҳори ташвиш  менамоянд. Вай  зикр  намуд, ки  дар  бораи   сабабҳои  муташанниҷ  гардидани  вазъияти  Қирғизистон  чизе  гуфтан  душвор  аст,  вале  хабарҳои  аз  Бишкек  расида дар  бораи  ҳалок  шудани  одамон  сабаби  ташвиши  ҷиддӣ  мегарданд. Мо ба  ақли  солим  ва  хирадмандии  ҳамаи  тарафҳои  даргир  умедворем, гуфт Н.Бордюжа. Вай  қайд  кард, ки  боварӣ  дорад, ҳам ҳукумат  ва  ҳам   мухолифин  дар  Қирғизистон  душвории  вазъиятро  дарк  намуда, барои  ба  эътидол  овардани он   кӯшиш  ба  харҷ  дода,  хунрезии беҳуда  ва  хараҷу  мараҷро  барҳам  медиҳанд. Қирғизистон   яке  аз   иттифоқчиёни  Русия  ва   узви  созмонҳои  дар  қаламрави  ИДМ  ташкилёфта  буд ва  мебошад.  Мо  мухолифин  ва  ҳукумати Қирғизистонро  даъват  мекунем, ки  барои таъмини  амнияти  мамлакат  ва   мардуми он  аз  ҳадафҳои  ғаразнок  даст  кашида,  сари  мизи  мушовара  нишинанд,  гуфт  Н.Бордюжа.