НАҚШАҲО ИҶРО МЕШАВАНД

Хуҷанд,  29 апрел. (АМИТ «Ховар», Санавбар  Мақсудова). —  Дар  давоми  семоҳаи  аввали  соли  2010  ба буҷети  маҳаллии  вилояти  Суғд  94  миллиону  965  ҳазор  сомонӣ  ворид  гардид, ки  аз  нақшаи  пешбинишуда 13  миллиону 131  ҳазор  сомонӣ  зиёд  мебошад. Аз  Раёсати  умумии  молияи  вилоят ба  мухбири  АМИТ «Ховар»  хабар  доданд, ки   қисмати  хароҷоти  буҷет  дар  ин  давра  85,8  миллион  сомониро   ташкил  дод.  Аз  ин  маблағ  63,9  миллион  сомонӣ  барои   қонеъ  гардонидани талаботи  соҳаҳои  маориф, тандурустӣ,  ҳифзи  иҷтимоӣ  ва  фарҳанг  сарф  карда  шуд. Тӯли  се  моҳи  гузашта  мувофиқи  нақшаи  тасдиқшуда аз  ҳисоби  буҷети  вилоят  ба  шаҳру  ноҳияҳо  кӯмак  расонида шуд.  Аз  ҷумла,  ба шаҳри  Табошар 335,5  ҳазор, ба  ноҳияи  Айнӣ 1 миллиону  201  ҳазор,  ба  ноҳияи  шаҳристон 808,9  ҳазор,  ба  ноҳияи  Ашт 1  миллиону  231,9  ҳазор, ба  ноҳияи  Кӯҳистони Мастчоҳ  613  ҳазор  ва  ба  ноҳияи Ғончӣ  1  миллиону 757  ҳазор  сомонӣ  кӯмак расонида шуд. Дар  ин  муддат  мувофиқи  дархости  комиссияҳои  шаҳрию  ноҳиявӣ   барои  ҷуброни  маблағи  пардохти  қувваи  барқ ва гази  истифодашуда  барои  гурӯҳҳои  камбизоати  аҳолӣ  3  миллиону 51,7  ҳазор  сомонӣ ҷудо  карда шуд.