НАМОИШГОҲ ДАР ҚАСРИ НАВРӮЗГОҲИ ХУҶАНД

Душанбе, 22 апрел. (АМИТ «Ховар», Марзия Саидова).- 30 ширкати истеҳсолию саноатии Ҷумҳурии Исломии Эрон дар нахустин намоишгоҳи байналмилалӣ, ки таҳти унвони «Хуҷанд-2010»   аз 26 апрел то 1 май дар Қасри Наврӯзгоҳи шаҳри Хуҷанд баргузор мегардад,  иштирок менамоянд. Назар ба иттилои коршинос дар масоили ташкили намоишгоҳҳо ва рекламаи ширкати «Гроу Интернейшнл» Муҳаммад Имронӣ,  хадаф аз ташкили намоишгоҳ тақвияти ҳамкориҳои иқтисодию тиҷоратӣ, ба роҳ мондани робитаҳои тиҷоратӣ байни тоҷирони тоҷику эронӣ ва табодули таҷриба дар бахши истеҳсоли маҳсулоти гуногун аст. Намоишгоҳ бо ибтикори Мақомоти иҷроияи маҳаллии ҳокимияти давлатии шаҳри Хуҷанд ва ширкати байналмилалии «Сурӯши Хуросон» -и шаҳри Машҳад, ки собиқаи фаъолияти беш аз 25 сола дорад гузаронида мешавад. Дар намоишгоҳ маҳсулот ва молҳои гуногун,  аз қабили масолеҳи сохтмонӣ, кишоварзӣ, ҷавоҳирот, атриёт,  асбобҳои гуногуни электрикӣ, маҳсулоти хӯрока, ки истеҳсолкунандаҳояшон ширкатҳои «Гулчикон», «Пирӯзбом», «Роҳгустари Форс», «Сувенит Кеш», «Чой Рефоҳ» ва ғайра мебошанд ба намоиш ва фурӯш гузошта мешаванд.