НИЗОМИЁНИ ТОҶИК ДАР РАСМИ ГУЗАШТИ ИДИ ҒАЛАБА ШИРКАТ МЕВАРЗАНД

Душанбе,  30 апрел. (АМИТ «Ховар», Кристина  Эрлих). —  Тавре  хабар  дода шуда буд,  9  май  дар  Майдони  Сурхи  пойтахти  Русия  ба  муносибати  65 – солагии Ғалабаи  бузурги  халқҳои  шӯравӣ бар фашизм  расми  гузашти  низомии  идона   баргузор  мегардад.  Дар  он  қисмҳои  ҳарбии  Британияи  Кабир,  ИМА,  Фаронса  ва  Лаҳистон  иштирок  менамоянд. Дар  расми  гузашти  идона  низомиёни  ҷумҳуриҳои  собиқи  шӯравӣ  —  Озарбойҷон,  Арманистон, Белорусия, Қазоқистон, Қирғизистон, Тоҷикистон ва  Украина  низ  ширкат  меварзанд. Аз  дафтари  матбуоти  Вазорати  мудофиаи  Тоҷикистон  ба  мухбири  АМИТ «Ховар»  хабар  доданд, ки  дар  расми  гузашти  идонаи   шаҳри  Маскав   75  нафар  донишҷӯи  Донишкадаи  ҳарбии Вазорати  мудофиа  ширкат  хоҳад  варзид. Онҳо  аз Майдони  Сурх  бо  Парчами  давлатии ҷумҳурӣ  гузар  хоҳанд  кард.