ПОСИ ХОТИРИ АРБОБИ БАРҶАСТАИ ДАВЛАТИИ ТОҶИКИСТОН

Душанбе,  30 апрел. (АМИТ «Ховар», Бекназари  Абӯбакр). —  4  май  110 —  солагии  рӯзи  таваллуди  арбоби  барҷастаи  сиёсию  ҳизбӣ  ва давлатии  Тоҷикистон   Абдураҳим  Ҳоҷибоев  ҷашн  гирифта  мешавад. Дар  ин  бора  раиси  вилояти  Суғд  Қоҳир  Расулзода  қарори  дахлдор  қабул  намуд. А.Ҳоҷибоев  соли  1900  дар  шаҳри  Хуҷанд  таваллуд  шудааст.  Ӯ  аз  соли  1929  то  соли 1933  раиси  Шӯрои Комиссарҳои  Халқии  ҶШС Тоҷикистон  буд.  Саҳми А.Ҳоҷибоев  дар  ташкили  ҷумҳурии  мустақили  шӯравии  Тоҷикистон, тараққиёти  хоҷагии  халқи  ҷумҳурӣ  дар  солҳои  аввали ташкили он  ниҳоят  бузург  аст.  Ӯ солҳои  30 – уми  асри  гузашта  масъалаи   эътирофи  забони тоҷикиро  ҳамчун  забони  давлатӣ  ба  миён  гузошта  буд. А.Ҳоҷибоев  ва  ҳамсафонаш  дар  сохтмони   роҳи оҳани  Тирмиз – Душанбе, қобили  кишт  гардонидани   замин   дар  водии  Вахш,  сохтмони  нерӯгоҳҳои  хурду  калони  барқӣ,  корхонаҳои  саноатӣ  ва  шаҳрҳои  нав  хеле  калон  аст. А.Ҳоҷибоев  аз  соли  1933  то  соли 1938  дар  Маскав  кору  зиндагӣ  мекард. Ӯро  соли 1938 ба  ҳабс  гирифта,  бо  ҳукми  суд  парронданд. Ҳайати  мушовараи  низомии  Суди  олии  ИҶШС   моҳи  декабри  соли 1957  бегуноҳии ӯро  исбот  намуд.