СУҒУРТАИ ИХТИЁРӢ КАМ ШУД ЧАРО?

Душанбе, 6 апрел. (АМИТ «Ховар», Лаззат Диловарзод).-  Дар соли 2010 ширкатҳои суғуртавӣ ҳамагӣ 1123552 шартнома имзо намудаанд, ки нисбат ба ҳамин давраи соли 2009 6 фоиз камтар   аст. Аз шартномаҳои имзошуда 73,8 фоизаш аз рӯи суғуртаи ихтиёрӣ буда, 26,2 фоизашро суғуртаҳои ҳатмӣ ташкил медиҳанд. Тибқи маълумоти Агентии давлатии омори назди Президенти Ҷумҳурии Тоҷикистон дар ҶТ 16 ширкати суғуртавии иҷозатномадошта амал мекунад, ки аз онҳо 2 –тояш ширкати давлатӣ ва 14 –тояш ғайридавлатӣ мебошанд. Аз рӯи ҷамъбасти пешакии маълумотҳои оморие, ки ширкатҳои суғуртавӣ пешниҳод кардаанд, маблағи барномавии ширкатҳои суғуртавӣ 19092,4 ҳазор сомониро ташкил мекунанд, ки 57797,6 ҳазор сомонии он маблағи аъзоҳақии суғуртавӣ мебошад. Дар ин давра пардохти суғурта 12876,5 ҳазор сомониро ташкил додаст.