ТАВИЛДАРА ҒОЛИБИ ОЗМУН

Душанбе, 22 апрел. (АМИТ «Ховар», Лутфия Эшонқулова).- Бахшида ба 65-умин солгарди Ғалаба дар Ҷанги Бузурги Ватанӣ, 7 маи соли ҷорӣ дар Театри давлатии ҷавонони Тоҷикистон ба номи М.Воҳидов консерти гулчини озмуни минтақавии театрҳои халқӣ ва ҳаваскорони саньат таҳти унвони «Родмардони Ватан» баргузор мегардад.  Тавре ба мухбири АМИТ «Ховар», дар маркази матбуоти Вазорати фарҳанг хабар доданд, аз 5 то 18-уми апрели соли равон тибқи фармони Вазорати фарҳанги Ҷумҳурии Тоҷикистон дар шаҳру ноҳияҳои тобеи ҷумҳурӣ — Турсунзода, Ҳисор, Шаҳринав, Варзоб, Рўдакӣ, Ваҳдат, Ҷиргатол, Тоҷикобод, Рашт, Тавилдара, Нуробод, Роғун, Файзобод Озмуни минтақавии театрҳои халқӣ ва хаваскорони санъат гузаронида шуд, ки ғолибони он барои иштирок кардан дар гулчини озмуни «Родмардони Ватан» роҳхат гирифтанд. Барномаи консертии пешниҳодшудаи ҳаваскорони шаҳру ноҳияҳо аз 10 бахш иборат буда, максади он тарғиботи дўст доштани Ватан, ифтихор аз ватандорӣ, зебописандӣ, пойдории сулҳу ваҳдат, якпорчагии Тоҷикистон ва оштипазирӣ нисбат ба ҷанг мебошад. Аз ҷумла, барномаи таҳиянамудаи театри халқии ноҳияи Тавидара беҳтарин ҳисобида шуда, ғолиби озмун дониста шуд. Ҳаваскорони ноҳияи Шаҳринав низ бо як бахши консерти лапар «Сайри чаман» ба гулчини озмун қабул карда шуд. Аз вилояти Суғд театри халқии ноҳияи Ғончӣ, аз вилояти Хатлон театри халқии ноҳияи Ёвон, аз вилояти Бадахшон театри халқии ноҳияи Ишкошим ғолибони озмуни вилоятӣ гардида ба гулчини озмуни «Родмардони Ватан» пешниҳод гардиданд.