ВАЗЪИ МАОРИФ ДАР БАДАХШОН

Хоруғ, 24 апрел. (АМИТ «Ховар», Л. Додо). – Соли равон барои соҳаи маориф аз буҷаи ВМКБ 42 миллиону 227 ҳазор сомонӣ ҷудо шудааст, ки нисбат ба соли 2009-ум 1 миллиону 652 ҳазор сомонӣ зиёд мебошад. Ин нуқта зимни нишасти матбуотии роҳбарияти Раёсати маорифи вилоят қайд карда шуд. Зикр гардид, ки дар давоми се моҳи аввали соли ҷорӣ бинои нави мактаб дар деҳаи Бешгумбази ноҳияи Мурғоб мавриди истифода қарор дода шуда, бунёди бинои 11 мактаби нав идома дорад. Барои сохтмони бинои хобгоҳи литсейи техникии Навобод 300 ҳазор сомонӣ ҷудо гардидааст. Инчунин, барои 80 нафар тарбиятгирандагони интернати вилоятии ноҳияи Рўшон хобгоҳи нави барҳаво мавриди истифода қарор дода шуд. Аз Вазорати маориф 13 номгўи китобҳои дарсӣ бо теъдоди 1490 адад, «Харитаи ҷуғрофии Тоҷикистон» 720 адад ва китобчаи «Ҳаёт ва фаъолияти Имоми Аъзам» ба толибилмони вилоят дастрас гардид.  «Дар баробари ин ҳама пешравиҳо, камбудиҳо низ ҷой доранд. Аз ҷумла, таҷҳизоти утоқҳои фанҳои дақиқ фарсуда шуда, бо таҷҳизоти муосир муҷҷаҳаз нагардидааст. Аз ин сабаб, дарсҳо бештар дар шакли назариявӣ мегузаранд. Адабиёти бадеӣ бо забони тоҷикӣ низ кам аст», — зикр карда шуд дар нишасти матбуотӣ.