ҚУРЪОН БАРОИ ҲАР ЯК ОИЛАИ ТОҶИК

Душанбе,  20 май. (АМИТ «Ховар», Дилшодаи Ҷонмард). — Дабири кулли  Ҷамъияти байналмиллалии ҷавонони мусулмон Муҳаммад Бодаҳдаҳ дирӯз, баъди мулоқоташ бо Президенти Ҷумҳурии Тоҷикистон Эмомалӣ Раҳмон   ба хабарнигорон сӯҳбати мухтасар анҷом дод. Вай зикр намуд, ки аз натиҷаи мулоқот  ба Сарвари давлати Тоҷикистон қаноатманд аст. Меҳмон тазаккур дод, ки дар Душанбе зимни иштирок дар маҷлиси вазирони корҳои хориҷии мамлакатҳои аъзои Созмони конфронси исломӣ аз ташаббуси Сарвари давлати Тоҷикистон Эмомалӣ Раҳмон дар бораи дастраси ҳар оилаи тоҷик гардондани китоби муқаддаси Қуръон ба забони тоҷикӣ огоҳ шудааст. «Бо ин мақсад 1 миллиони 250 хазор нусха китоби Қуръон чоп карда мешавад. Мо қарор додем, ки дар ин кори хайр саҳм гузорем. Бо маблағи ҷамъияти мо дар навбати аввал 10 ҳазор нусха Қуръон чоп карда мешавад. Теъдоди он минбаъд зиёд хоҳад шуд». «Мо омода ҳастем, ки дар чопи китобҳои Куръони карим саҳми худро гузорем ва таъкид кард, ки беш аз 1 миллион нусха Қуръони каримро бо тарҷумаи тоҷикӣ чоп намуда дастраси чавонони Тоҷикистон менамояд.Ҷаноби олӣ аз ин  пешниҳоди мо   изҳори ташаккур намуданд. Ин боздиди аввалини ман буд ва хатман боз боздидҳо хоҳад шуд», гуфт  Муҳаммад Бодаҳдаҳ. Дар охир меҳмон ба Президенти Тоҷикистон ва мардуми тоҷик барои  пазироии гарм ва меҳмоннавозӣ изҳори қадрдонӣ  намуд.