АМОНАТБОНК: «КӮМАК БА ЗАРАРДИДАГОНИ КӮЛОБ ДАВОМ ДОРАД»

Душанбе, 27 май. (АМИТ «Ховар, Покиза Маҳмадбекова). — Офати табии рӯзҳои 6-7 майи соли ҷорӣ ба навоҳии  минтақаи Кӯлоби вилояти Хатлон расида, ҳисорот ва зиёни ҷониву моли зиёдеро ба бор овард. Офати аз боронҳои сел ба амаломада садҳо манзилҳои истиқоматӣ ва молу ашёи рузгори  сокинони минтақаи мазкурро вайрону валангор намуда, ба коми худ бурд. Ҳукумати  ҷумҳурӣ аз соатҳои нахустини ҳодиса, чорабиниҳои зиёдеро баҳри бартараф намудани оқибатҳои офати мазкур амалӣ намуда,  тамоми сохторҳои давлатӣ ва ғайридавлатиро баҳри рафъи он сафарбар намуд. Ба   мухбири АМИТ «Ховар» аз хадамоти матбуоти Бонки Давлатии амонатгузории (БДА) «Амонатбонк» Одинашо Муродов иттилоъ дод, «Бади як рузи ҳодисаи номбурда дар  БДА «Амонатбонк» суратҳисобҳо бо арзи миллӣ ва асъори хориҷӣ барои Фонди кӯмак ба зарардидагони шаҳри Кӯлоб ва навоҳии вилояти Хатлон кушода шуд, ки то имрӯз амал мекунанд». «То 26 майи соли 2010 ба суратҳисобҳои номбурда аз ҷониби 410 шахсони ҳуқуқи ва вақеъӣ, дар маҷмӯъ бо арзи миллӣ ва асъори хориҷӣ ба миқдори як миллиону 247 ҳазору 886 сомонӣ ворид гаштааст»,- гуфт, О. Муродов. Ворид гаштани кӯмакҳои номбурда ба суратҳисоби фонди мазкур идома дошта,  ташкилоту корхона ва шахсони алоҳида аз дохил ва хориҷи кишвар,  баҳри рафъ ва дастгирии сокинони ин мавзеъ маблағҳои худро мегузаронанд.