АЗ ҲАБСХОНА БАРОМАДА ДАСТ БА ДУЗДӢ ЗАД

Душанбе, 31 май. (АМИТ «Ховар», Жасмин Назарова). – Ба шӯъбаи корҳои дохилии ноҳияи И. Сомонӣ аризаи шаҳрванди Ҷумҳурии Исломии Эрон Мирзохон Фиамак Меҳдӣ соли таваллудаш 1982, муваққатан истиқоматкунандаи пойтахт, ворид гардид. Тавре ба хабарнигори АМИТ «Ховар» аз дафтари матбуоти Вазорати корҳои дохилии ҶТ иттилоъ доданд, рӯзи  27 майи соли равон шахсони номаълум бо тариқи кушодани қулфи дар вориди хона шуда, аз он ҷо 1 адад таҷҳизоти компютерӣ, ҷавоҳироти тиллоӣ ва қисман ашёи хона, ки ҷамъ ба маблағи 1 ҳазору 320 сомонӣ дуздида аз ҷои ҳодиса ғайб заданд. Ҳангоми гузарондани чораҳои фаврӣ-ҷустуҷӯӣ аз ҷониби кормандони бахши кофтукови ҷиноии шӯъбаи корҳои дохилии ноҳияи И. Сомонӣ шаҳрванд Умед Мирзоев, соли таваллудаш 1978, истиқоматкунандаи ш. Душанбе пеш бо моддаи 244 КҶ ҶТ доғи судӣ дорад, дастгир карда шуд. Хамчунин тафтишот муайян намуд, ки шаҳрванд У. Мирзоев аввали моҳи апрели соли равон бо тариқи дуздӣ аз хонаи истиқоматии шаҳрванд Дилафрӯз Собирова, соли таваллудаш 1972, сокини пойтахт, ҷавоҳироти тиллоӣ ҷамъ ба маблағи 2000 доллари ИМА дуздида аз ҷои ҳодиса ғайб задааст. Аз ӯ далели шайъи қисман гирифта шуда нисбаташ парвандаи ҷиноӣ оғоз шуда, тафтишот идома дорад.