БАДАХШОН ОБОД МЕШАВАД

Хоруғ,  13 май. (АМИТ «Ховар», Л.Додо). —  Мақомоти иҷроияи  ҳокимияти  давлатии  Вилояти  Мухтори  Кӯҳистони  Бадахшон  ба  ҷашни  Ваҳдати  миллӣ  ҳамаҷониба  тайёрӣ  мебинанд. Барои  иҷрои нақшаҳои тайёрӣ ба  ҷашн   аз  ҳисоби  буҷети  маҳаллӣ  162  миллион  сомонӣ  ҷудо  карда  шуд. Мухбири  АМИТ «Ховар»  хабар  медиҳад, ки  ҳоло  дар   минтақаҳои гуногуни  вилоят  сохтмон  ва таъмири  262  бино  ва  иншоот  давом  дорад.  Аз  ҷумла  дар  ноҳияи  Рӯшон  ба  шарафи  ҷашн  47  муассиса,  дар  шаҳри  Хоруғ  44  муассиса,  дар  ноҳияи  Дарвоз  44  муассиса,  дар ноҳияҳои Роштқалъа  ва  Шуғнон  36 – тои  муассиса  ба  истифода  дода  хоҳад  шуд. Дар  сохтмони  ин  иншоотҳо  мутахассисони  хориҷӣ  низ  саҳм  мегузоранд.  Аз  ҷумла,   ширкати  сохтмонии «Мега группа» — и  шаҳри  Истамбули  Туркия  дар  ноҳияи  Дарвоз варзишгоҳ  бунёд  менамояд. Дар  доираи  тайёрӣ  ба  ҷашни  Ваҳдат  дар  шаҳри  Хоруғ  таъмири  бозори  марказӣ  оғоз  ёфт.  Тибқи  нақша   дар  ин  ҷо  танҳо   маводи  ғизоӣ  ва  маҳсулоти  кишоварзӣ  ба  фурӯш  бароварда  мешавад. Дар  бозори  мазкур   кушодани  100  дӯкон  ба  нақша  гирифта  шудааст. Муҳаррир Қудратов А.