ДАР ТОҶИКИСТОН 4104 ХОНА ЗАРАР ДИДААСТ

Душанбе,  14 май. (АМИТ «Ховар», Наталя  Михайлова). —  Ҳукумати  Ҷумҳурии Тоҷикистон  расман   хабар  дод, ки  аз  аввали  сол то 12  май   бар  асари  фалокатҳои гуногуни  табиӣ,  аз  ҷумла,  зилзила ва  боришҳои тӯлонӣ  ба  иқтисодиёти  мамлакат  зарари  калони  моддӣ  расонида шуд. Дар  натиҷаи  ин  фалокатҳо  бештар  аз  20  шаҳру ноҳия  зарар  дид. Дар  хабари  ҳукумат  гуфта  мешавад, ки   дар  натиҷаи  фалокатҳои табиӣ 40  нафар  ҳалок, 300 кас  маҷрӯҳ  ва  33  нафар  беному  нишон  гум  шуд. Ғайр  аз ин  4104  хонаи  истиқоматӣ, 78  мактаб  ва  муассисаи  томактабӣ,  19   муассисаи  тиббӣ, 27  муассисаи  фарҳангию  иҷтимоӣ, 424  километр  роҳи  мошингард,  130  кӯпрук,  130  километр  хати  интиқоли  барқ,  64   километр  хати  алоқа,  59  километр соҳили  дарёҳо, 221  километр  иншооти  обрасонӣ,  14  бунгоҳи  насосии  обкашӣ, 48  километр  водопровод  ва  канализатсия, 15  ферма ва  қутан  барои  10 ҳазор  сар  чорво, 38  ҳазор  гектар  киштзор  харобу  валангор  гардида, 3098  сар  чорво  нобуд  шуд. Аз  рӯи  ҳисобҳои  пешакӣ,  маблағи  зарар  аз 600  миллион   доллари  ИМА  зиёд  аст. Вазъият  бо  сабаби  душворгузар  будани  роҳи   маҳалҳои  зарардида,  боз  ҳам  мушкилтар мегардад. Дар  бисёр  минтақаҳо  масолеҳи  бинокорӣ,  бомпӯшӣ,  техникаю  таҷҳизот,  маснуоти  оҳану  бетонӣ,  маводи  сӯхт,  маводи  озуқа,  дору,  хайма, генераторҳои  барқӣ   ва   асбобу  анҷоми  дигари  зарурӣ  намерасад. Дар  ин  бора  Сарвазири  Ҷумҳурии  Тоҷикистон  Оқил  Оқилов  сухан  ронд.  Вай  зикр  намуд, ки Тоҷикистон  бо  сабаби  нокифоя  будани  захираҳои  мавҷуда   оқибатҳои  фалокатро  мустақилона  бартараф  карда  наметавонад.