ДЎСТДОРИ КЎДАКОНУ НАВРАСОН

Турсунзода, 27 май. (АМИТ «Ховар» Ҳотам Рабиев)- Нашриёти «Адиб» китоби шоираи хушбаён Шарифаи Аъламзодро бо номи «Холаҷонам дар боғча» бо теъдоди ҳазор нусха дастраси хонандагон намуд. Маҷмўа бо шеърҳои кўдаконаи шоира ва расму мусаввараҳои зиёду ҷолиб хеле ходанбоб аст. Шарифаи Аъламзод – хатмкардаи  факултаи физикаи Донишгоҳи миллӣ буда, солҳои зиёд мудири боғчаи бачагонаи рақами 10-и шаҳри Турсунзода аст. Дар боғчаи мазкур қариб 200 нафар фарзандони коргарони корхонаи воҳиди давлатии «Ширкати Алюминийи тоҷик» тарбият мегиранд. Шарифаи Аъламзод аз хурдӣ ба эҷоди тарона, шеър, ҳикоя ва қисса машғул буда, то ин дам чанд маҷмўаи эҷодаш нашр гардидааст. Боз ҳам  завқовару дилпазир ва ширину рангин намудани фаъолияти кўдакистонҳо орзўи деринаи шоира – мудири кўдакистони рақами 10-и шаҳри Турсунзода Шарифаи Аъламзод аст.