ЭКСПОНАТҲОИ ИЛМИИ ТОҶИКИСТОН ДАР «ЭКСПО – 2001»

Душанбе,  17 май. (АМИТ «Ховар», Покиза  Маҳмадбекова). —  Раиси Академияи  илмҳои  ҷумҳурии  Тоҷикистон  Маҳмадшо  Илолов, ки  дар  намоишгоҳи  байналмилалии «ЭКСПО – 2010»  ҳузур  дошт, ҳамкасбони  худ   аз   мамлакатҳои  ИДМ  ва  намояндагони   вазорати  илму  технологияи  Чинро  ба  толори  Тоҷикистон  даъват  намуда,  ба  онҳо  дар  бораи  экспонатҳои  илмии  толори  Тоҷикистон  маълумот  дод.  Тамошобинон  ба   таърихи  Тоҷикистон,  аз  ҷумла  ёдгориҳои  «Тахти  Сангин», ки   дар  давоми  асрҳои  4 – 3  то  даврони  мо  сохта  шудааст, муҷассамаи  «Раққоса»,  нусхаи  ҳайкали  думетраи  Буддо,  экспонатҳои илмӣ  аз  қалъаи  Ҳулбук, «Бабри  Хатлон»   ва  ғайра   мароқ  зоҳир  намуданд. М.Илолов   дар  ҷавоби  саволи  тамошобинон  дар  бораи   рӯйдодҳои  муҳимтарини  таърихи  халқи тоҷик  ва  ҳаёти  имрӯзаи  он  маълумоти  ҷолиби  диққат ва шавқовар дод. Мутахассисони  Италия  ба   муҷассамаи  «Модагурги  Румӣ»  мароқ  зоҳир  намуданд, ки   нусхаи  аслии он  дар  қасри  Капитолии  Рим   гузошта  шудааст. М.Илолов   нақл  кард, ки   муҷассамаи  мазкур  дар  натиҷаи  кофтукови  бостоншиносон  таҳти  роҳбарии   олими  тоҷик Нӯъмон  Неъматов  аз   шаҳристони  Бунҷикат – пойтахти  давлати  Усрушана – Қалъаи  Қаҳ – Қаҳа  ёфт  шудааст.  Таҳқиқоти олимон  нишон  медиҳад, ки  Осиёи  Марказӣ  дар  вақташ   яке  аз   нуқтаҳои  марказии  Ҷодаи  бузурги   абрешим  буда,  мамлакатҳои  Ғарбу  Шарқро бо  ҳам  мепайваст.