ХОНАҲОИ ИСТИҚОМАТӢ БАРОИ ЗАРАРДИДАГОН

Хуҷанд,  14 май. (АМИТ «Ховар»,  Санавбар  Мақсудова). —  Раиси  вилояти  Суғд  Қоҳир  Расулзода  дирӯз  бо  раисони  шаҳру  ноҳияҳо,  роҳбарони  бонкҳо ва  соҳибкорону  тоҷирони  вилоят  машварати  корӣ  гузаронид. Иштирокчиёни  машварат  пешниҳодоти  Президенти  Ҷумҳурии  Тоҷикистон  Эмомалӣ  Раҳмонро  дар  маҷлиси  ғайринавбатии  ҳукумати  ҷумҳурӣ  дар  бораи  расонидани  кӯмак  ба  зарардидагони фалокати табиӣ дар  шаҳри  Кӯлоб  дастгирӣ  намуданд.  Дар  маҷлис  қарор  дода шуд, ки   аз  ҳисоби  вилояти  Суғд  дар  шаҳри  Кӯлоб  маҳаллаи  истиқоматии  «Сомониён»  бунёд  карда шавад. Дар  маҳаллаи  мазкур  40  хонаи  истиқоматӣ  сохта  хоҳад шуд. Муовини  раиси  вилоят  Ғафурҷон  Ҳакимов  ба  мухбири  АМИТ «Ховар»  хабар  дод, ки   ҳамаи  биноҳоро  сохтмончиёни  вилояти  Суғд  месозанд. Биноҳои  нав  инчунин  бо  асбобу  анҷоми  зарурии  рӯзгор,  аз  ҷумла,  яхдону  телевизор ва мебел  таъмин  карда  хоҳанд  шуд,  гуфт Ғ.Ҳакимов.