КӮДАКОНРО АЗ ФАЛАҶИ ШАДИД НАҶОТ МЕДИҲАНД

Душанбе,  4 май. (АМИТ «Ховар», Ибодат Давлатова). — Имрӯз, 4 майи соли ҷорӣ дар тамоми ҷумҳурӣ маъракаи  эмкунии умумии кӯдакон бар зидди бемории фалаҷи шадид (полиомиелит) оғоз гардид. Бо ин мақсад дар Вазорати тандурустии ҶТ нишасти матбуотӣ баргузор гардид, ки дар он намояндагони Вазорати тандурустӣ, Ташкилоти Умумуиҷаҳонии Тандурустӣ (ТУТ) ва Хазинаи кӯдакони Созмони Милали Муттаҳид ширкат намуданд. Вазири тандурустии мамлакат Нусратулло Салимов дар баромад худ қайд намуд, ки  то имрӯз дар ҷумҳурӣ зиёда аз 206 нафар ба ин беморӣ ба қайд гирифта шудаанд, ки аз ин 32 нафар ташхиси лаборатории худро ёфтанд ва 1 ҳолати фавт низ мавҷуд аст. Бояд тазаккур дод, ки ягона роҳи пешгирии ин беморӣ гузарондани эмкунӣ дар байни кӯдакон мебошад. Бо ибтикори Вазорати тандурустӣ ва дастгирии ТУТ ва Хазинаи кӯдакони СММ ба ҷумҳурӣ ба таври фаврӣ ба миқдори 3,960 ҳазор ваксина ворид шуд.  Эмкунӣ дар се давра дар байни кўдакони 6 сола, ки 1 100 000 нафарро ташкил медиҳанд, гузаронида мешавад. Даври якум аз 4 то 8 май, даври дуюм аз 18 то 22 май ва даври сеюм аз 1 то 5 июни соли ҷорӣ гузаронида мешавад.