МУРОҶИАТИ ҲУКУМАТИ ТОҶИКИСТОН БА МАМЛАКАТҲОИ ҶАҲОН

Душанбе,  20 май. (АМИТ «Ховар»,  Наталя  Михайлова). —  Ҳукумати  Ҷумҳурии  Тоҷикистон  дирӯз  ҳамроҳи созмонҳои  байналмилалии  гуманитарӣ  ба  мамлакатҳои  ҷаҳон ва  созмонҳои  байналхалқӣ  муроҷиат  карда,  хоҳиш  намуд, ки  барои  расонидани  кӯмак  ба  ҳазорон  нафар  зарардидагони  фалокати  табиӣ  дар  қисмати  ҷанубии  Тоҷикистон  5,3  миллион  доллари  ИМА    ҷудо  кунанд. Муроҷиатнома   амалӣ  сохтани  26  барномаро   дар  бар  мегирад, ки   намояндагиҳои  СММ  ва  созмонҳои  ғайридавлатӣ  пешниҳод  намудаанд.  Ҳадафи   ин  барномаҳо  расондани  кӯмак ба онҳое  мебошад, ки бар  асари   боришҳои тӯлонӣ  бесарпаноҳ  монда,  айни  ҳол  дар  хаймаҳо  зиндагӣ  мекунанд.  Ҳадафи  дигари   барномаҳо  барқарор  сохтани   киштзори  нобудшуда,  чорвои  талафёфта,  бо  оби  тоза  таъмин  намудани   сокинони   шаҳри  Кӯлоб  ва  7  ноҳияи  дигари  бар  асари  фалокат  зарардида  мебошад. Ҳукумати  Ҷумҳурии  Тоҷикистон  ҳамроҳи   созмонҳои  хайрия  ба таври таъҷилӣ  ба  4500  нафар   одамони  зарардида ва  маҳалҳои  дигар  кӯчонидашуда кӯмак  расонид. Вале онҳо  то  имрӯз  ба таъминоти  моддию  маънавӣ  эҳтиёҷ  доранд. Акнун  Ҳукумати  Тоҷикистон ва  шарикони он  ба  кӯмаки  мамлакатҳои  ҷаҳон  ва  созмонҳои  байналмилалӣ   умед  мебанданд.  Тавре  ки  маълум  аст,  Тоҷикистон  яке аз  мамлакатҳои  қашшоқтарини  иттиҳоди  собиқи  Шӯравӣ  буд. Ин  мамлакат  имрӯз  ҳам  дар  қатори  мамлакатҳои  камбизоати  ҷаҳон  қарор  дорад, гуфт  намояндаи доимии  СММ  дар  Тоҷикистон  Майкл  Ҷонс. Аз  рӯи  маълумоти  охирин  дар  натиҷаи  боришҳои  тӯлонӣ,  омадани  сел  ва обхезӣ  дар  Тоҷикистон  40  нафар  ҳалок  гардида,   бештар  аз  300  кас  маҷрӯҳ  шуд  ва  33  нафари  дигар  бе ному  нишон  гардид. Илова  бар  ин   бар  асари  фалокати табиӣ 4104  манзили  истиқоматӣ  зарар дида,   аз  ҷумла,  683  хона пурра   хароб  гардидааст. Инчунин  78  мактаб,  19  муассисаи  тиббӣ, 27  муассисаи  иҷтимоию  фарҳангӣ,  424  километр  роҳи  мошингард, 130  кӯпрук,  130  километр  хати  интиқоли  барқ, 64  километр  хати  алоқа, 59  километр  иншооти   соҳили  дарёҳо, 221  километр  канал, 14   бунгоҳи   насоси   обкашӣ, 48  километр  хати  обрасонӣ, 10  ҳазор  сар  чорво,  инчунин  38  ҳазор  гектар  киштзор   нобуд  гардид. Маблағи  умумии  зарари  фалокати табиӣ бештар  аз 600 миллион  доллари  ИМА – ро  ташкил  медиҳад.