НАМОЯНДАГОНИ 50 МАМЛАКАТ ДАР ДУШАНБЕ ҶАМЪ МЕОЯНД

Душанбе,  25 май. (АМИТ «Ховар», Фарангис  Раҳимова ). —  Аз  8  то  10  июни  соли равон  дар  шаҳри  Душанбе  бахшида  ба  проблемаҳои об конфронси  байналхалқӣ  баргузор  мегардад. Дар  ҷараёни он  рафти  иҷрои  тадбирҳои  миёнамӯҳлати  Даҳсолаи  байналмилалии   амалиёти  «Об  барои зиндагӣ»  таҳлил  карда  мешаванд. Мухбири  АМИТ «Ховар»  хабар  медиҳад, ки   дар  конфронси  мазкур   намояндагони   50  мамлакат, инчунин  50 созмони байналмилалӣ,  минтақавӣ,  созмонҳои  ғайридавлатӣ,  сафирон,  вазирон,  муассисаҳои  молиявӣ,  олимон ва  соҳибкорону тоҷирон иштирок  хоҳанд  кард. Ҳамчунин   иштироки   намояндагони  СММ, САҲА, СҲШ, СКИ,  Созмони  ҳамкории  иқтисодӣ,  Кумитаи  иҷроияи  ИДМ,  Ҷомеаи   иқтисодии  Евразия  ва  ғайра ба  нақша  гирифта шудааст. Дар  маросими  ифтитоҳи  конфронс   Президенти  Ҷумҳурии  Тоҷикистон  Эмомалӣ  Раҳмон  иштирок  ва  суханронӣ  менамояд. Дар  ҷараёни  конфронс   ташкили   маҳфилу  машваратҳо  дар  мавзӯъҳои  марбут  ба   сарфаю  саришта, истифодаи оқилонаи  об   ва  ҳамкории  мамлакатҳои  ҷаҳон  дар  ин  бобат  пешбинӣ  карда  мешавад. Қарори  гузаронидани  конфронси  мазкур  бо ташаббуси  Ҳукумати  Тоҷикистон  моҳи  декабри  соли  2009  дар   иҷлосияи  64 – уми Маҷмаи  кулли  СММ   қабул  шуда буд. Муовини   вазири   корҳои  хориҷии  ҷумҳурӣ  Маҳмудҷон  Собиров  ба  мухбири  АМИТ «Ховар»  гуфт, ки   конфронси  байналмилалӣ  ба  муҳокимаи  масъалаҳои   муҳимтарини   марбут ба  истифодаи  оқилонаи   захираҳои  об,  афзунтар  сохтани  самараи   истифодаи  он  дар  соҳаҳои  гуногуни  иқтисодиёт,  аз  ҷумла,  дар  соҳаҳои  кишоварзӣ,  энергетика,  тағйир  ёфтани   иқлим,   сафарбар  намудани   захираҳои  молиявӣ,   имкониятҳои  соҳавии  беҳтар  сохтани  сифати об,  масъалаҳои  гендерӣ,  беҳтар  сохтани таъминоти  аҳолии  мамлакатҳои  Осиё  ва  Африқо  бо  оби  тоза  ва  ғайра  бахшида  мешавад. М.Собиров  афзуд, ки  дар  фарҷоми  конфронс  эъломияи  вазирон  қабул  карда  хоҳад шуд.  Дар  он  натиҷаҳои  нимаи  аввали  Даҳсолаи   байналмилалии  амалиёти «Об барои  зиндагӣ» инъикос   карда  мешаванд.  Эъломия  инчунин  тавсияҳо  ва  пешниҳодҳоро  дар  бораи  афзун  гардонидани  самараи   тадбирҳо   дар  сатҳи   миллию  минтақавӣ  ва байналмилалӣ  дар  давраи  дуюми  даҳсола  дар  бар  мегирад. Ҳукумати  Ҷумҳурии  Тоҷикистон   эъломияи   вазиронро  ба  муҳокимаи   иҷлосияи  панҷуми  Маҷмаи  кулли  СММ  пешниҳод  хоҳад  кард. Конфронси  байналмилалӣ  бо кӯмаки  молиявии  Ҳукумати  Ҷумҳурии  Тоҷикистон,  Муассисаи  рушди СММ, САҲА, ЮНЕСКО ва  иштироки  бевоситаи  раёсату  шӯъбаҳои  дахлдори  СММ  гузаронида  мешавад.