НАМОЯНДАГОНИ АП СААД ДАР КУҶО ҶАМЪ МЕОЯНД?

Душанбе, 31 май.(АМИТ «Ховар», Марзия Саидова).-Маҷлиси  нахустини сайёри Шӯрои Ассамблеяи парлумонии Созмони Аҳдномаи амнияти дастаҷамъӣ /СААД/ аз  1 то  2 –юми июни соли 2010 дар пойтахти Арманистон шаҳри Ереван баргузор мегардад. Дар маҷлис, ки таҳти раёсати Раиси Думаи Давлатии Федератсияи Русия, Раиси Ассамблеяи парлумонии СААД  Борис Грызлов баргузор мегардад, намояндагони парлумонҳои давлатҳои Русия, Қазоқистон, Тоҷикистон, Арманистон  ва Белорус иштирок менамоянд. Аз шӯъбаи равобити байнипарлумонии Маҷлиси намояндагон ба АМИТ «Ховар» иттилоъ доданд, ки дар маҷлиси сайёр Тоҷикистонро муовини Раиси Маҷлиси  намояндагони Маҷлиси Олии ҷумҳурӣ  Назира Ғаффорова ва муовини раиси Кумита оид ба масъалаҳои байналмилалӣ Амирхон Сафаров намояндагӣ менамоянд. Дар маҷлис масъалаҳои тақвияти ҳамкории давлатҳо дар доираи СААД баррасӣ мешаванд. Интизор меравад, ки иштирокдорони маҷлиси сайёр бо Президенти Арманистон Серж Саргсян, Раиси Маҷлиси Миллии Арманистон Овик Абрамян ва Вазири мудофиаи Арманистон Сейран Оганян мулоқот менамоянд. Инчунин, намояндагони парлумонҳои Ассамблеяи парлумонии СААД аз муҷтамеи меъмории ёдгории қурбониёни таъбизи нажодии арманиҳо,  воқеъ дар боғи «Цицернакаберд» боздид менамоянд. Бояд зикр кард, ки Ассамблеяи парлумонии СААД моҳи майи соли 1992 созмон дода шуда, ҳафт давлат – Арманистон, Белорус, Қазоқистон, Қирғизистон, Русия,  Тоҷикистон ва Ӯзбекистонро муттаҳид месозад.