НАРХИ БЕНЗИН БОЛО МЕРАВАД Ё НЕ ?

Душанбе,  25 май. (АМИТ «Ховар», Покиза  Маҳмадбекова). – Аз рӯи  маълумоти Вазорати  рушди  иқтисод  ва  савдо зимни  ворид  сохтани  маводи  сӯхт  ва  равғанҳои  молиданӣ  аз Туркманистон  ба  Тоҷикистон  ба  маблағи 20  фоизи  арзиши  он  андози  арзиши   изофа  ва  андози  аксиз  гирифта  мешавад. Дар  худи  Тоҷикистон  ҳам  зимни   ворид  сохтани   сӯзишворӣ  ба  андозаи  18  фоизи  арзиши он   андози  арзиши  изофа  ва  аз ҳар тоннаи  сӯзишворӣ  ба  маблағи  20  евро   андози  аксиз  мегиранд. Илова бар  ин  ба  андозаи  5  фоизи   арзиши   сӯзишворӣ  боҷи  воридотии  гумрук   ситонида  мешавад.  Туркманистон  маводи   сӯхти  худро  ба  воситаи   савдоҳои  музояда  ба  мамлакатҳои  дигар  мефурӯшад.  Мамлакатҳои  аъзои  Ҷомеаи   иқтисодии  Евразия   мувофиқи  созишномаи   сарфи  назар  кардани  андозбандии  дубора  танҳо  аз  мамлакати истеҳсолкунандаи  маводи  сӯхт  андоз  мегиранду  халос. Вале   Русия  аз  фурӯши  маҳсулоти нафт  боҷи  содиротӣ  мегирад.  Ҳукумати  Русия  1  майи  соли равон  дар  бораи   зиёд  кардани  боҷи  содиротии  маҳсулоти  нафт  қарор  қабул  кард. Акнун  барои  фурӯши  як  тонна  бензин  дар  ин ҷо  ба  ҷои  193,5   доллари  ИМА  203,7  доллар  боҷи  содиротӣ  гирифта  мешавад.  Мувофиқи  маълумоти  Хадамоти  гумруки  назди  Ҳукумати  Ҷумҳурӣ соли  2009  ба  Тоҷикистон 634,2  ҳазор тонна  маводи  сӯхт ворид  карда шуд.  Аз  ин  ҷумла,  551,3 ҳазор  тонна  аз  Русия,  15,7  ҳазор  тонна  аз  Туркманистон ва 67,2  ҳазор  тонна  аз  мамлакатҳои  дигар  ворид  карда шуданд.  Дар  давоми   чор моҳи  аввали  соли  2010  ба  Тоҷикистон 191,2  ҳазор тонна  маҳсулоти нафт   ворид  карда шуд.