РАСМИ ГУЗАШТИ НИЗОМӢ ДАР БОҒИ ҒАЛАБА

Душанбе,  7 май. (АМИТ «Ховар»,  Наталя  Михайлова). —  Субҳи  имрӯз  дар  Боғи  Ғалабаи  пойтахт ба  муносибати 65 – солагии Ғалабаи  халқҳои  шӯравӣ  дар  Ҷанги  Бузурги  Ватании  солҳои 1941 – 1945   ҷамъомади  идона  ва  расми  гузашти  низомӣ баргузор  гардид. Дар назди  ҳозирон  Президенти  ҷумҳурӣ,  сарфармондеҳи  олии  қувваҳои  мусаллаҳи  мамлакат  Эмомалӣ  Раҳмон  сухан  кард. Вай  зикр  намуд, ки  халқи  шарафманди  тоҷик  имрӯз  ҳамроҳи  ҳамаи   халқҳои  дигар   иди  Ғалабаро  бо  камоли  сипосу  миннатдорӣ  аз   қаҳрамониҳои  ҷангӣ  ва  фидокории  фарзандони  ватани  худ  ҷашн  гирифта,  хотири онҳоеро  пос  медорад, ки   дар   муҳорибаҳои  ҷанг  ҳалок гардиданд. Э.Раҳмон  таъкид  намуд, ки Ҷанги  дуюми  ҷаҳон  фоҷиаи  бузурги  инсоният буд. Дар он  тақрибан  72   давлати  хурду  калон  иштирок  дошт.  Дар натиҷаи  ҷанг  зиёда  аз 55  миллион  нафар  кушта,  садҳо  миллион  нафари дигар  маҷрӯҳ  шуд,  ҳазорон  шаҳрҳои  хурду  калон   харобу  валангор  гардида,   марказҳои  калони  фарҳангии  дорои  аҳамияти  умумибашарӣ  несту  нобуд  карда шуданд. Тоҷикистон  ҳам дар  таъмини  Ғалаба  бар  фашизм  саҳми  калон  гузошт. Аз  Тоҷикистон  дар  муҳорибаҳои  Ҷанги  Бузурги  Ватанӣ  бештар аз  300 ҳазор нафар   иштирок дошт,   Қисми  зиёди онҳо  дар  муборибаҳои  ҷанг  қаҳрамонию  далерӣ нишон  доданд. Тоҷикистон  тӯли  солҳои  ҷанг  аз   ҷумҳуриҳои  дигари  шӯравӣ  бештар аз  40  ҳазор  нафар,  аз  ҷумла,  10  ҳазор  бачагонро  қабул  карда,  ба оғӯши  худ  гирифт. Деҳқонони тоҷик  солҳои  ҷанг  намунаи олии  меҳнатдӯстӣ  нишон  дода,  аскарону  афсаронро  бо  либосу  хӯрока  таъмин  мекарданд.  (Матни  пурраи  суханронии Президенти ҷумҳурӣ Э.Раҳмон  дар   воситаҳои  ахбори оммавӣ  чоп  мешавад). Дар  фарҷоми  суханронии Президенти  ҷумҳурӣ   дар  Боғи  ғалаба  бахшида ба  солгарди навбатии Ғалабаи  бузург  расми  гузашти низомӣ  баргузор  гардид. Дар он   хизматчиёни  ҳарбии  гарнизони  Душанбе,   қисмҳои  ҳарбии  Артиши   марзбон,  артиши  дохила  ва Кумитаи  давлатии  амнияти  миллӣ иштирок намуданд.