СОЗИШНОМАИ ҲАМКОРӢ БАЙНИ «АМОНАТБОНК» ВА БРТА БА ИМЗО РАСИД

Душанбе, 1 май. (АМИТ «Ховар», Покиза Маҳмадбекова). —  30 апрели соли равон дар Душанбе маросими ба имзо расонидани созишномаи ҳамкорӣ байни Бонки давлатии амонатгузории Ҷумҳурии Тоҷикистон «Амонатбонк» ва Бонки рушд ва таҷдиди Аврупо (БРТА) сурат гирифт. Тавре ба мухбири АМИТ «Ховар» аз БДА «Амонатбонк» иттилоъ доданд, тибқи созишнома БРТА тавассути Амонатбонк ба самти дастгирии соҳибкории хурду миёна дар Тоҷикистон маблағгузорӣ менамояд. БРТА барои дастгирии соҳибкорӣ дар соҳаи кишоварзӣ ба миқдори 1 миллион доллари ИМА ва барои дастгирии соҳибкории тиҷоратӣ 1 миллион доллари ИМА, ҷамъ ба миқдори 2 миллион доллари ИМА маблагузориҳоро бояд анҷом диҳад. Созишномаро аз ҷониби Амонатбонк Раиси раёсати БДА «Амонатбонк» Гулнора Ҳасанова ва аз ҷониби БРТА  Роҳбари намояндагии Бонк дар Тоҷикистон Ульф Хиндстром, ба имзо расониданд. БРТА яке аз бонуфузтарин бонкҳои Аврупо ба ҳисоб рафта, таваҷҷӯҳи зиёд ҷиҳати ҳамкорӣ бо ташкилотҳои молиявии кишвар дорад ва чандест, ки намояндагию қароргоҳи он дар шаҳри Душанбе фаъолият мекунад. Бонки мазкур, аслан то имрӯз якчанд созишномаро бо бонкҳои тиҷоратии кишвар пиёда намуда буд. Созишномаи мазкур нахустин созишномаи БРТА бо ташкилотҳои давлатии Тоҷикистон мебошад.